Na ka bynta kito kiba don ka jingpang type 2 diabetes, ka jinglah ban bam ban dih katba mon ka lah ban kham buh jingeh khamtam halor ka jingjied ki jingbam ba kai bad ki jingbam kiba ym don jingtei namar kane ka lah ban pynjur ka jingkiew ka shini ba mih ruh hapdeng ba jur ka jingshit.
Hynrei phim dei ban duh jingkyrmen, wat hapdeng ba phi don kane ka jingpang phim da donkam ban sangeh noh ka jingleit sha ki jingkhawai sngewbha ne ki jingrakhe. Kawei napdeng ki lynti ba phi lah ban leh halor ka koit ka khiah jongphi ka dei ka jingdih shibun ka um bad bam ki jingbam ba jur ka jingdon ka um kiba lah ban tehlakam halor ka jingkiew ka shini. La kdew ba ka jingtyrkhong ka met ka dei kaba lah ban nang pynjur ka jingdon ka shini ha ka snam, kaba lah ban nangbanjur ka jingshitom.
Kine harum ki long napdeng ki jingbam ba phi lah ban bam ban pynneh ka jinglong pyngngad bad tehlakam ka jingkiew ka shini :
U sohkhia : Une u jhur uba ym don starch satia u long u jingbam ba kynsai hapdeng kito ki briew kiba don ka jingpang diabetes. Kine ki duna ban don ka calorie bad ka carbohydrates hynrei ki dap da ka jingdon ka fibre, nutrient, antioxidant kiba ym lah satia ban long ka daw halor ka jingkiew ka shini. Une u jhur ukot ka jingdon kumba 96 percent tang ka um, kumta u paw ba u lah ban pyllait na ka jinglong tyrkhong jong ka met bad kyntiew ha ka liang ka koit ka khiah ha kiba bun ki liang.
U Seleri : Une u jhur bam im u dei uba dap da ka jingdon ki nutrient bad u dei uba ïarap ruh ban khanglad ban ngat ha ka jingpang type 2 diabetes. Kum ka nuksa ka Vitamin K kaba don ha u Seleri ka dei kaba lah ban pynduna ka jinglong tyrha ha ka met, ka jingaibor halor ka jingpyndonkam ïa ka insulin bad pynjanai halor ka jingpyndonkam ïa ka glucose. Shuh shuh u Seleri u dei uba kot ka jingdon 95 per cent ka um bad don ruh ka fibre, kaba lah ban tehlakam halor ka jingkiew ka shini.
U Palong : Une u jhur sla jyrngam u dei uba lah ban pynneh ka jingdon um ha ka met. U dei uba duna ban don ka calorie, fat bad ka carb, hynrei u jur ha ka jingdon ka fibre, nutrient, vitamin bad mineral. Uba riewspah ha ka jingdon ki phytochemicals bad don kumba 91 per cent ka um, u Palong u duna ka jingdon ka glycemic index, kaba mut ba ka jingjied ban bam ïa une u jhur ka ïarap ban pynbiang halor ka jingdon ka glucose.
U Sohmynken jhur : U Sohmynken jhur u long sa uwei pat u jait jhur ba jur ka jingdon um bad lah ban shalan bha ïa ka fibre, nutrient bad antioxidant. Ki long ruh ki thymmei halor ka jingdon ka potassium, kiba ïarap halor ka jingtreikam bha u klongsnam, ka jingtylliat jingbam bad ka jingtreikam hapoh ki dohksah.
