SPL 2021-22: Jem khnap ka Shillong Lajong ha ka Langsning, rem da 1-3

0

Shillong, Nailar 31 : Ka Shillong Lajong FC sa shisien ka la jem khnap biang ha ka Langsning FC ha kaba ka la rem da 1-3 kol ha ka jingïakhun ha ka sngi Balang ha ka lympung ïalehkai OC Blue Shillong Premier League 2021-22 ha madan Third Ground, Polo, Shillong.
Na bynta ka Langsning FC u Kynsaibor Lhuid u thep ar kol bad u Figo Syndai shi kol katba ïa ka shi kol na bynta ka Shillong Lajong FC la thep da u Gladdy Kharbuli.
Haba mih madan ha katei ka sngi, ka Langsning ka don ha ka kyrdan kaba ar da kaba khur 18 point katba ka Shillong Lajong C ka don ha ka kyrdan ba hynriew da kaba khur 11 point.
Ha ka wat ïakhun kaba nyngkong (first leg), ka Langsning ka la pynliem da 1-0 ïa ka Shillong Lajong kaba la long ha ka 16 tarik Jylliew 2022. Da ka jingjop ha ka sngi Balang ka Langsning ka dang bteng ban bat kyrdan ba ar bad ka don jingkyrmen ha kaban ïaknieh ïa ka nam lahduh jong ka OC Blue SPL ha kaba ka duna satang khyndiat point ïa ka Mawlai SC kaba lamkhmat ha ka kyrdan ba nyngkong da kaba khur 26 point.
Ha ka jingïakhun ha ka sngi Balang, ki ar tylli ki team ki la pynkylla ha ka rukom pynmih madan ïa ki rangïalehkai ha ka thup ki 11 ngut, ha kaba u Surjay Kumar Pariyar u rangap kol ka Langsning u la mih nujli ha ka jaka u Frolicson Dkhar bad u Batiphar Swer nangta u Pura Nongbri ki la mih ha ka jaka u Roikhihbha Nongtdu bad Kitboklang Pale. Ka Lajong ka la pynkylla ha kaba u Henry Nongneng bad Aman Ahlawat ki khlem mih madan ha ka liang ka bynta ba shadien.
Ka Lajong ka la pynmih madan ha ka thup ki 11 ngut ïa u Amon Lepcha hadien ba u la wanphai biang sha ka kynhun. Hynrei u Lepcha u la hap ban shongben noh tang hapoh 10 minit na ka daw ka jingmynsaw.
Ka jingïalehkai ka long kaba ïakhaid bha bad dei tad haduh ka 22 minit jong ka jingïalehkai ba ka Langsning ka la plie pyrda nyngkong lyngba ka kol ba la thep da u Kynsaibor Lhuid. U Lhuid u la thep ïa ka kol kaba itynnad bha ha kaba rangap kol ka Lajong u khlem ïoh ban kyrda.
Ka Langsning ka la ïoh bun ki kabu ha ki minit ba dang sah jong ka kylla step hynrei ka jingpyrshang jong ki bun ki shu lait salit ban rung shapoh kol ha kaba haduh kaba kut jong ka kylla step ka Langsning ka la lamkhmat da 1-0.
Mar syn sdang ka jingïalehkai ha ka kylla miet, ka Langsning ka khlem ailad satia bad ñion beit sha ka kut jong ka Lajong bad khyrwit thep kol bunsien bad da katei ka rukom ïalehkai ka la ïoh biang sa kawei ka kol ïa kaba la thep da u Figo Syndai ha ka minit ba 51.
Lyngba katei kitei ki ar kol ka la nang pynkhem ïa ka kynhun kaba la nang ïakhun tyngeh. Ki rangïalehkai ka Shillong Lajong ruh khlem da duh mynsiem hynrei ki la ïakhun tyngeh ban pynphai ïa kitei ki ar kol bad da katei ka mynsiem ïakhun, u Gladdy Kharbuli u la ïoh ban pynhiar mynsiem khyndiat ïa ka kynhun da kaba thep ïa ka shi kol ha ka minit ba 53.
Katei ka shi kol bala thep da ka Lajong ka la nang pynkhlaiñ ïa ka Langsning ha kaba ka khlem ailad satia hynrei ha ka la ïakhun tyngeh bad ñion kylliang sha ka kut jong ka Lajong. Ka jingïakhun ka la nang itynnad bad ïathnem bha ba baroh arliang hynrei khatduh ka Langsning ka la ïoh ban pynskhem ïa ka nam jop hadien ba u Lhuid u la thep sa ïa ka kol kaba ar bad kaba lai na bynt ka kynhun kaba la pynliem syndon da 3-1 kol.
Katkum ka jingpynbeit da ki nongpynïaid ba ka jingïalehkai jong ka OC Blue SPL kan long sa ha ka sngi Thohdieng ha kaba ka Mawlai SC kan ïakhun pyrshah ïa ka Mawkhar SC ha ka por 3:45 janmiet.Ha ka 20 tarik Naitung, ka jingïalehkai hapdeng kitei ki ar tylli ki team ka la kut da ka jingïakhaid klem da lah ban ïathep kol

Leave A Reply

Your email address will not be published.