Ki hamsaïa ki ong ba ïa ki jaka Sorkar ha Shillong la sdang ai sha ki heh Saipan: Lambok Marngar

Shillong, Nohprah, 07: U President ka KSU u samla Lambokstarwell Marngar ha ka sngi Saitjaiñ ula ong ba ka KSU kan sa tih bniah ban lap ïa ki jingshisha halor ka khubor hamsaïa ba ka seng ka la ïohsngew ba don kiba ong ba la sdang ban ai sha ki heh Saipan kiba nabar jylla ïa ki jaka Sorkar kiba don ha nongbah Shillong.
“Lada dei ka khubor kaba shisha ka KSU kan ym ailad satia ba ki poiwir kin ïoh ban wan long trai ïa ka khyndew ka shyiap ha kane ka Bri u Hynniewtrep,” ong u President ka KSU haba kren ha ka jingïalang kynmaw burom ïa ka lyngkhuh sngi ïap jong u President barim ka KSU Bah Bull N. Lyngdoh.
Hapoh ka jingïalam jong u President u Samla Lambokstar Marngar kumba ju leh manla u snem ki dkhot ka KSU ki la leit ban kynmaw burom ïa ka lyngkhuh sngi ïap jong u Bah Bull bad ban buh syntiew ha u durmot uba la shna hajan ka Law College, Dhanketi.
“Lada ka Sorkar ka pyrshang ban leh kum kita ki buit poh ka dei ka sorkar kaba lilam ïa ka ri bad ka jaidbynriew. Ngi hap ban peitngor kum ki samla bad ngim dei ban sngap ïa ki jingshah kynthoh na sharum bad na shaneng. Ngi hap ban peitngor ba ki poiwir ki poihap kim dei ban long ki trai khlieh ha kane ka Bri u Hynñiewtrep,” ong u samla Marngar.
“U Bah Bull u dei u nongïalam barim hynrei ki lynti ïaid jong u kim juh rim lano lano ruh,” u la ong bad bynrap, “mynba u Bah Bull u dang long u nongïalam jong KSU bun ki briew kiba beiñ bad kiba kynthoh hynrei mynta pat ki dei ki juh ki briew kiba ïaroh da kaba ong ba kat uto u nongïalam, yn nym ïoh shuh.” U la pynkynmaw ruh ïa ki paradkhot ha ki jingïaid lynti jong ka seng ki ju don bun ki jingshah kynthoh bad ki jingshah beiñ bapher bapher.
“Phi ki nongïalam ba pura bad ki dkhot jong ka KSU ba phi hap ba long kiba phikir bad kiba ïaishah bad kiba sngewrit. Trei la ka kam bad pyndep hok ïa la kamram kaba la tynrong ha ka tyrpeng jong phi. Ki dang don bun ki kam ba ka seng ka dang dei ban pyndep nangne shakhmat,” la kyntu u President ïa ki paradkhot.
“Ka ing byndi ka dei kaba ap hakhmat tam na ka bynta ki nongïalam jong ka KSU. Hynrei kynmaw ba ha ka por jong u Bah Bull la kem bad la thep mukotduma pyrshah ïa u kaba ïasyriem dur thik la kumba u dei u nongïalam ki seng lehnoh. Ai ngin ïai long ki lehnoh ban ïada ïa ka ri bad ka jaidbynriew. Ai ba ngin ïai long ki lehnoh ban pynshngaiñ ïa ka ri bad ka jaidbynriew hynrei ngim dei ban tieng ïa ka iing byndi kaba ka Sorkar ka ju khot sngewbha ïa ki nongïalam bad ïa ki dkhot jong ka KSU,” la ong u samla Marngar.
“Ngim kwah ban shah set byndi ka jaidbynriew hynrei ai ngin shong byndi ma ngi kum ki samla ban dang im ka ri bad ka jaidbynriew,” u la ong shuh shuh.