Ki bun ki MDC ym dei tang arngut ba kwah rung sha ka NPP

0

Shillong, Jymmang 18 : Ki dang don bun ki MDC kiba kwah ban wan ïasnoh noh bad ka NPP ha Khasi Hills Autonomous District Council (KHADC) nalor ki arngut ki MDC jong ka Congress kiba ka jingïakren ka dang ïaid shakhmat.
Katkum ki tyllong khubor ba la ïoh lum la ïathuh ba katba ka jingïakren hapdeng kitei ki arngut ki MDC ka Congress bad ki nongïalam ka party ka dang ïaid, ka jingïakren bad kawei pat ka kynhun ka dang don ha lynti.
“Hadien ba ka jingïakren bad kitei ki MDC ka Congress ka la dep ngin sa ïa kren bad kawei pat ka kynhun jong ki MDC kiba don kajuh ka thong,”ong ka tyllong khubor na ka party.
Lah ban kdew hangne ba ïa ka bor synshar ha KHADC la ïalam da ka UDP ha ryngkat ka jingïatrei lang bad ka NPP. Hynrei kumba long mynta lada ka NPP ka ïoh ban khring sa ïa kitei ki arngut ki MDC ka Congress bad kiwei kiwei, khlempep kan sa knieh noh ïa ka bor synshar na kti jong ka UDP hapoh ka jingïalam jong u Bah Titos W Chyne kum u CEM.
Haba pyrshang ban kylli, ki tyllong khubor ki ïathuh ruh ba katei ka kynhun kaba hadien kam dei shuh tang na kawei ka party. “Ïa mynta ngim pat kwah ban pynpaw than hynrei ha ka por kaba bïang kan sa paw pyrthei lut.”
Ha kajuh ka por haba pyrshang pat ban ïa kren bad kitei ki arngut ki MDC jog ka Congress kiba la paw kyrteng ba kin leit pynïasoh noh sha ka NPP, kim shym la treh satia ban ong ei ei. Hynrei kaba paw ka long ba ki dang ap shwa kaei kaban mih na ka jingïakren kaba khatduh bad ki nongïalam ba rangbah jong ka NPP kaban sa long shen.

Leave A Reply

Your email address will not be published.