Ïaid stet ka jingpyntrei ïa ka Shillong SBTCC ha 9 lad, hapoh 2 snem yn pyndep

0

Shillong, Jymmang 18 : Ka jingtei ïa ka Shillong Business cum Tourism and Cultural Centre ha Khyndailad ka la ïaid stet bha bad na ka liang ka sorkar ka khmih lynti ba hapoh ar snem yn lah ban pyndep noh.
“Nga dap da ka jingkmen kaba khraw ban ïohi ïa ka jingïaid stet ka jingyntreikam ïa kane ka projek,”ong u Symbud Myntri Rangbah ka jylla ba dei peit ïa ka tnad Urban Affairs, Bah Sniawbhalang Dhar haba kren bad ki lad pathai khubor hadien ba u la wan jurip ïa katei ka projek ha kane ka sngi Palei.
Shuh shuh u ong ruh ba un pyrshang ban pyntikna baka jingpyntrei ïa katei ka projek kadei ban dep noh hapoh arsnem bad ban aiti noh sha ka sorkar.
Ïa katei ka Centre la tei ha ka jaka jong kaMeghalaya Transport Corporation. Katkum ka jingïathuh da u Symbud Myntri Rangbah, katei ka projek ka shong dor haduh 260 klur tyngka.
La ong ruh ba katei ka projek ka long ban pyntikna ba ka MTC kan lah ban ieng ha la ki jong ki kjat.
Ka MTC kadei kawei na ki phra tylli shnat treikam jong ka sorkar kaba treikam duh nong katkum ka kaiphod jong u Comptroller and Auditor General of India ha u 2017.

Leave A Reply

Your email address will not be published.