Ki bor sorkar kin ym khang kumto khlem daw ïa ka toll gate ha Umdihar : Kong Grace

Shillong, Jylliew 28 : Ka MDC ka Liang Pyrshah na Nongshken, Kong Grace Kharpuri ka la pynpaw ba kam sngewlah ngeit satia ba ki bor distrik jong ka Ri Bhoi kin shu khang noh kumto ïa ka toll gate ha Umdihar khlem da don ïa ka daw kaba biang.
Haba kren ha ka kynta kylli jingkylli ha ka sngi khatduh jong ka Dorbar Mangtyngka jong ka KHADC ha kane ka sngi Palei, ka MDC ka la ong, “Ngam ngeit satia ba ki bor distrik kin shu khang kumto ïa ka toll gate khlem da bishar bniah bha ïa ka kam.”
Nangta ka la ong ruh ba ka la don ka hukum ba ym shah satia ban don ïa ki toll gate lane ki check gate ha lynter ka surokbah National Highway.
Kane ka MDC ka la buh jingkylli ruh ïa ka Executive Committee ba kumno kan lah ban pynshisha ba ka toll gate ha Umdihar kam dei satia kaba la pynieng beaiñ.
Na ka liang u Executive Member ka tnad Trade, Bah Winston Tony Lyngdoh haba jubab halor ka jingkylli u la ong ba ki bor distrik ki la pyndonkam da ka bor ban khang ïa ka toll gate khlem da pyntip shwa da ka lynti kaba dei lane phah notis sha ka Council.
“Nga kwah ban ïai ban biang ba ka khyrdop ha Umdihar kam dei satia kaba beaiñ bad kane ka la don la slem bha. Ka Executive Committee ka dang ïai ap ïa ka jingpyntip ha ka rukom kaba dei na Deputy Commissioner ka Ri Bhoi,” la ong u EM.
U la ong ruh ba ka Khasi Hills Autonomous District Council (KHADC) ka dei ka bor treikam kaba ki dkhot ki dei kiba la jied da u paidbah. “Kumta ngim lah ban shu pdiang tang lyngba ki jingtip ba ngi ïoh na ki lad pathai khubor lane lyngba ki jingpyntip da ka ktien. Ngi donkam da ki jingthoh ban pynshai na ki bor distrik,” u la ong da kaba bynrap ruh ba ka jingtreikam jong ka khyrdop ha Umdihar ka dang sangeh shwa katba ym pat ïoh ïa ka jingpyntip da ka lynti kaba dei.
U EM u la pyntip ruh ba katei ka toll gate kam dei satia kaba buh ha ka surok-bah hynrei kadei ha ka lad kaba don kumba katto katne mitar ei ei na ka.
“Ngi sngewthuh ïa ka jingdonkam ban pyllait ïa ka national highway na kino kino ki jingwit. Kumta ïa u nongshim wai ïa ka khyrdop ha Umdihar ruh la bthah ïa u ba un leh kumta ban buh ïa ka khyrdop katto katne na ka highway,” bynrap biang u Executive Member.
Nalorkata, u ong ruh ba ka EC kan ym leh kano kano ka kam kaba long pyrshah ïa ka hukum jong ka Iing Bishar lane ki kyndon jong ka.