Shillong, Jymmang 15: Ka Dorbar Shnong Lumshatsngi, Kench’s Trace da ka jingiatrei lang bad ka Excise Department East Khasi Hills District, ki la ïoh kurup shibun ka kyiad pyrsi bad ka kyiad phareng (IMFL) ha ka jingleit khynra ba kyndit ha ka miet 11tarik Jymmang.
Ïa kane ka jingkhynra la pynlong ha ki katto katne ki ïing kiba don markhap bad ka madan home guard bad ïa ki nongdie kyiad beain la pynngat ha ki kyndon ain bad la tian bishar ïa ki.
Ka Dorbar Shnong ka la ai ka jingmaham kaba tyngeh ïa kine ki nongdie kyiad beain ki ba ju mlien ban leh ïa kane ka kam na ka por sha ka por, naba ka jingleh ka jong ki ka la pynjot ïa kiba bun ki longing bad ïa ka imlang sahlang.
Ka Dorbar Shnong Lumshatsngi Kench’s Trace ka maham jur ïa baroh kiba ju mlien ban wan thied bad dih kyiad ha kine ki jaka haba ong ba kino kino kiba wan leh ki kam beain hapoh u pud u sam ka Dorbar Shnong, lada ki dei ki briew kiba na Shnong lane nabar shnong, kin ngat ha ki jingpynsaja ki bor shnong bad kumjuh ha ki bor jong ka ain.
