Shillong, Nailar, 05: U National Vice President jong ka National People’s Party (NPP) u Bah Prestone Tynsong uba long ruh u Symbud Myntri Rangbah ka Jylla ha ka sngi Thohdieng u la kynnoh ba ki nongïalam jong ka All India Trinamool Congress (AITC) ki la pyrshang ban khroh ïa ki paralok kiba ïatreilang hapoh ka Sorkar MDA shwa ka elekshon 2023.
Ha ka jingïakren bad ki lad pathai khubor, u Bah Prestone u la kam ba ka AITC ka la phah da ki ksiang sha baroh ki MLA jong ki seng saiñpyrthei kiba ïatreilang hapoh ka Sorkar MDA. “Balei phim shu wan ïasnoh lang bad ngi namarba na ka liang jong ngi ngim da donkam (than ba phin shu phah khroh),” ong u Bah Prestone.
Kane ka jingkynthoh jong u Bah Prestone ka long halor ka jingkynnoh da ka AITC ba ka NPP bad ki paralok ki la pyrshang ban ïoh khwai ïa ki MLA jong ka AITC.
“Hynrei ngan ong ïa phi ba kin (AITC) ïai leh beit kumne manla ka sngi da kaba phah ïa ki ksiang sha ki paralok kiba ïatreilang hapoh ka MDA,” ong u Bah Tynsong.
Haba kylli, kato ka la don neem ka jingwan khroh ïa u ban pynïasoh bad ka AITC, u Bah Prestone u la ong, “kam da donkam eh ïa nga hynrei ïa kiwei kiwei MLA ki ïai pyrshang ban khroh.” Katkum ka jingong jong u, ka dei ka AITC kaba ïai bteng ban khroh ïa ki paralok jong ka MDA
U Bah Prestone u la kyntait ruh ban ïathuh katno ngut ki MLA kiba la thmu ban pynïasoh bad ka NPP. “Ïa mynta ka jingdon jong ki MLA ka NPP ka long 23 ngut bad ngi dang ïakhun ban ïoh haduh 34-35 Seat ha ka elekshon 2023,” kob u Bah Prestone.
U la kyntait war ba ka MLA ba la shah Sospon jong ka Seng Congress ka Dr. Ampareen Lyngdoh kan long ka kyrtong jong ka NPP na East Shillong Constituency ha u snem ban sa wan.
