Khot ïakren ka sorkar ïa ki Nonghikai bad Nongtrei ki Skul bad College ba ïa khih halor ka MNSCFS

Shillong, Jymmang 4 : Namar ka jingïakhih jong ki nonghikai bad nongtrei ki skul bad college deficit pyrshah ïa ka Provident Fund scheme ba thymmai, ka Sorkar Jylla kala khot ïa ki nongïalam jong ki kynhun ba don bynta sha ka jingïakren ban “sngewthuh kham bha ïa ki jingeh ba ki don bad ban wad ïa ki lad ki lynti ba lah ban pynbeit”.
“Ka Sorkar Jylla ka da kut jingmut shisha ban pynbeit ïa ka jingeh jong baroh ki kynhun ba don bynta ha ka lynti kaba tei. Halor kane, ka Tnad Education ka la khot ïa ki nongïalam jong ki seng ba don bynta sha ka jingïakren ban ïasngewthuh khambha ïa ki jingeh ba ki don bad ban wad ïa ki lad ki lynti ka lah ban pynbeit ïa kine ki jingeh” ong ka kyrwoh ba la pynmih da u Commissioner & Secretary ka tnad Education Vijay Mantri ha ka Lah Sngi U Blei.
“ïa kane ka jingïalang la buh ban pynlong ha ka 6 tarik Jymmang ha ka por 3 baje janmiet hapoh ka Main Conference Hall, Secretariat” kala bynrap.
Kane ka jingkhot ïakren ka la wan hadien ba ki nonghikai deficit ki la pynlong ïa ka poster campaign ha baroh kawei ka Jylla, ban kyntait ïa ka Meghalaya Non-Government School and College Employees Centralised Provident Fund Scheme, 2026, kaba ki kynnoh ïa ka kum ka “CPF thok” bad dawa ban phai biang sha ka draft 2023”.
Haba shimkhia ïa ka jingpyrshah, ka Tnad ka ong “Ha kajuh ka por, ki don ruh ki jingsngewkhia bala pynsngew da ki katto katne ki nonghikai bad ki nongtrei, khamtam hapdeng ki jaka pule deficit”. Ka Tnad ka pynpaw ba kane ka kam mynta ka don hapoh ka jingbishar ka ïing Bishar
“Ka kam ïa mynta ka long sub-judice hakhmat ka ïing Bishar High Court, bad ka Sorkar ka la dep ban aiti ïa ka scheme bala dep pynbna sha ka ïing Bishari bad ka dang ap ïa ka rai jong ka” ong ka kyrwoh.
Haba pynksan ïa ka scheme, ka tnad ka ong ba ka la dep pynmih jingpynbna “da ka jingthmu ban pyn thikna ïa ka jingpahuh pisa bad jingïada ïa palat 30,000 ngut ki nonghikai bad nongtrei jong ki skul bad college ki bym dei jong ka Sorkar ha kylleng ka Jylla”.
“Ka scheme ka ïeng kum ka jingpynkylla kaba kongsan ha ka kam pule dangle naba ka ai ïa ka provident fund bala pynbeit ryntih bad ka pension sha ki nongtrei bapher bapher, kynthup ki nonghikai deficit bad ki lecturer, nonghikai adhoc, SSA , RMSA, Hindi, Science Grant, pre-Primary nalor ki nongtrei ki bym dei ki nonghikai kiba don ha ki kyrdan bapher bapher” kala ong.
“Da kaba wanrah ïa baroh ki kynhun hapoh kawei ka rukom treikam bala pynïaid kat kum ki kyndon, ka scheme ka thmu ban kyntiew ïa ka jingïaryngkat, ka jinglong shai bad ka jinglong ba ïai neh” bynrap ka Tnad.
Kala pynpaw ruh ba ka jingkynthoh ka long kaba ai mynsiem haduh mynta. “Ka long kaba sngewdei ban pynpaw ba bun bah ki nonghikai bad ki nongtrei ki la pynpaw ïa ka jingsngewtynnad ïa kane ka skhim, bad ka kam ban plie ïa ka Permanent Retirement Account Number (PRANS) kala dep sdang ha kiba bun ki bynta jong ka Jylla” ong ka kyrwoh.