Khnang ban pyndep ïa ki jingtreikam kiba donkam na ka bynta ban pynlong ïa ka elekshon: Conrad

Shillong, Risaw 13: Ka jingpynjlan ïa ka samoi treikam jong ka GHADC ka long ban pyndep ïa ki rukom treikam kiba donkam na ka bynta ban pynlong ïa ka elekshon, la ong u Myntri Rangbah ka Jylla u Conrad K Sangma ha ka sngi Ba-ar.
Ka kynhun myntri ha ka 7 tarik u Risaw ka la rai ban pynjlan ïa ka samoi treikam jong ka Garo Hills Autonomous District Council da hynriew bnai.
Haba pynshai ïa kane ka rai, u Sangma u la ong ba ka sorkar ka don jingthmu ban pynlong ïa ka jingthep vote shwa ban kut ka samoi ba la pynjlan.
U la ong ba ïa ka jingmu ban phai constituency ym lah ban pyndep khlem da ioh ïa ka jingmynjur jong u Lat ka jylla ia ka separate electoral roll (SER).
“Ka jingpphiah constituency ka long ka jingtrei kaba jynjar bha kaba la donkam ban pynrung ïa ka thup nongthep vote ba la ka jong.Lada phiah constituency khlem ka lah ban pyndep lut, kan pynkylla khongpong ïa ka dur baroh kawei”, u la ong.
Ïa ka SER la mynjur da u Lat la kumba 10 sngi mynshwa, hadien kata ka delimitation committee ka la iaid sha khmat bad ka jingtreikam kaba khatduh, u la ong.
“Ai ba ngan kren da kaba shai sha ki nongshong shnong, khamtam ha Garo Hills ba kane ka dei ka kam kaba donkam.Ngim pyrshang ban pynslem ïa ka elekshon, ym lah ban pynlong ïa ka elekshon khlem ka jingphiah constituency bad ym lah ban pyndep ïa ka jingphiah constituency khlem ka SER”, la ong u Sangma.
“Mynta ba la dep ka SER, yn sa pyndep ïa ka jingphiah constituency, yn sa pynmih ïa ka electoral roll bad yn sa pynlong ïa ka elekshon, kine ki kam baroh ki ïadei bad ngi ngeit skhem ban pyndep ïa ka hapoh hynriew bnai bad pynlong ïa ka elekshon kham kloi”, u la bynrap.