Ka jingleit pynïasoh ki 8 ngut ki MLA ka UDP sha ka BJP ka dang don hapoh ka jingbeit bniah: Thomas A. Sangma

Shillong, Risaw 13: U Lamphang ka Ïingdorbar Thawaiñ ka Jylla Meghalaya, u la pynpaw ba ka jingpynïasoh ki 8 ngut ki MLA barim jong ka United Democratic Party (UDP) bad ka Bharatiya Janata Party (BJP) ka dang sah ha ka jingbishar bniah, bad ka rai ka dang ap haduh ban da pyndep ïa ki jingmynjur bad ki jingdonkam jong ka aiñ.
Ki 8 ngut ki nongthaw aiñ ki kynthup ïa u Bah Lahkmen Rymbui, u Bah Pius Marwein, u Bah Kyrmen shylla, u Bah Mayralborn syiem, u Bah Matthew Beyondstar Kurbah, u Bah Ollan Singh Suin, u Bah Balajied Kupar Synrem bad u Bah Synshar Thapar Roy.
Kane ka jingpynshai ka long hadien ba la aiti ïa ka shithi pynïasoh jong ki 8 ngut ki nongthaw aiñ sha ka ïing dorbar thawaiñ ka Jylla Meghalaya ha ka 25tarik Nailur, 2026, ha kaba la pyntip sha ka ïingdorbar ïa ka rai jong ki ba la pynïasoh sha ka BJP.Ha ka jingbym don jong u Lamphang, uba don ha kata ka por ha Malta, la aiti ia ki kot ki sla sha u Dr. Andrew Simons, Adviser (Legislation), Meghalaya Legislative Assembly.Ïa kine ki nongthaw aiñ la synran da u Bah Rikman G. Momin uba dei u state President ka BJP bad u MLA ka BJP u Bah Sanbor Shullai.
Haba kren ha ki lad pathai khubor ha ka sngi Ba-ar hadien ba la iakynduh ïa ki 8 ngut ki nongthaw aiñ, u Sangma u la pynshai ba ka ophis jong u kam shym la ithuh pura ïa ki kum ki MLA ka BJP, namar ba katei ka kam ka dang sah ha ka jingbishar bniah.
“Ka Speaker’s Office ka dang eksamin ïa ka, bad nga dang ap ïa ka jingai jingmut aiñ na ki tyllong khubor bapher bapher, kumta ngan nym ong ba ki dei ki MLA ka BJP, namar ba katei ka kam ka dang don ha ka jingbishar bniah”, u la ong.
U Lamphang u la batai ïa ka jingialang kum kaba sngewbha bad u la pynpaw ba u la pyntip sha ki nongthaw ain ïa ka jinglong jingman jong ka jingbishar bad ka jingdonkam ban bishar bniah shuh shuh shwa ban shim ïa ka rai.
U Sangma u la pyntip ba ka UDP ka la aiti ïa ka dorkhas ban pynduh ïa ki 8 ngut kum ki nongthaw ain.Hynrei la lap katto katne ki jingduna bad ki jingduna ha katei ka dorkhas, hadien kata la ai por shi sngi ïa ki nongialam ka UDP bad ki saw ngut ki MLA kiba dang sah ban pynbeit bad ban aiti biang ïa ka.Ka por ba la buh ka dei ban kut noh ha ka sngi Balang.
U la pynpaw ban rai ïa ka jingujor ban pynduh long nongmih khmat kan long ka kam kaba kongsan tam jong u, da kaba bynrap ba yn sa bishar bniah ïa kane ka kam katkum ki kyndon ba treikam bad ki kyndon jong ka riti synshar ka ri.
U Lamphang u la pynthikna ruh ba u dang bishar bniah ïa ki jingjia kiba ïadei, kynthup ïa ki jingjia ha ka saiñ hima sima kiba kham mynshwa kiba ïadei bad ka Trinamool Congress bad ka Congress, kumjuh ruh ïa ka rai jong u kaba mynshwa ha ka kam kaba kum kane, kaba dang don hapoh ka jingbishar bniah ha khmat ka ïingbishar ba donburom.
Haba pynksan ïa ka jingdonkam ban bishar bniah, u Sangma u la ong ba ka Ophis jong u Lamphang kam lah ban rai beit ïa kum kine ki mat bad donkam ïa ka por kaba biang ban bishar bniah ïa ki liang jong ka aiñ bad ka rukom treikam.
“Nga shim ïa ka por bad eksamin ïa ka khnang ba ngan lah ban shim rai da ka jingmut kaba shai”, u la ong bad bynrap ba ïa ka jingtreikam ym shym la thmu ban pynslem.
U Sangma u la pyniapher ruh hapdeng ka jingithuh ïa ka jingpyniasoh seng sain pyrthei bad ka jingpeit bniah ïa ka jingkynriah seng, da kaba ong ba kane kaba hadien ka dang don ha ka jingpyrkhat jong ka ophis jong u.
Watla u la kyntait ban batai ïa ka por na ka bynta ka rai ba khatduh, u Lamphang u la pynpaw biang ba un ïaid shakhmat hadien ba u la bishar bniah ïa ki jingai jingmut kiba ïadei bad ioh ïa ki jingai jingmut kiba donkam ha ka liang ka ain.