Kyrshan ka KHNAM ban pynlong kongsan ïa ka ktien Khasi haba ïakhun DSC na ka bynta ki post ha Khasi-Jaintia

SHILLONG, Risaw 13: Ka Khun Hynniewtrep National Awakening Movement (KHNAM) ka kyrshan tyngeh ban pynlong ïa ka ktien Khasi kaba kongsan na ka bynta ki test ha District Selection Committee (DSC) ha Khasi-Jaintia, da kaba kyntait ban pynlong ïa ka ktien Garo kum kawei pat ka lad bujli ha Khasi bad Jaiñtia.
Kane ka jingkynthoh ka wan hadien ba ka All Khasi Hills Achik Joint Action Committee (AKHAJAC) ka la wad ban pynrung ïa ka ktien Garo kum ka ktien ba lah ban jied (optional qualifying language) na ka bynta ban thungkam ha ki hynniew tylli ki district jong ka Khasi bad Jaintia Hills.
Haba pyrshah ïa katei ka jingdawa, u Working President ka KHNAM u Bah Thomas Passah u la ong ba ka seng ka ieng ryngkat bad ka HNYM kaba la dep ban pyrshah ïa katei ka jingthmu.
Haba ïadei bad ka Personnel Department office memorandum (OM), u Bah Passah u la ong, “Ka Sorkar ka la buh ïa ka jingpass ïa ka Khasi language test kum ka kyndon ba donkam ban ïoh ïa baroh ki kyrdan treikam kiba hap hapoh ka DSC ha ki san tylli ki district jong ka Khasi Hills bad ar tylli ki district jong ka Rilum Jaiñtia.”
Haba ïada ïa katei ka hukum, u la ong ba ka Meghalaya ka don ar tylli ki jaitbynriew kiba heh bad ka jingpyniakhlad ia ki jaka ka long ban iada na ka jingialeh pyrshah.
“Ka long kaba donkam bha ban sngewthuh ba ka jylla jong ngi ka don ar tylli ki jaitbynriew, ki Garo bad ki Khasi, bad la pyniakhlad ïa ka jaka hapdeng jong ki ban pynthikna ba kan ym don kano kano ka jingialeh pyrshah ha ki por ban wan,” la ong u Bah Passah.
Katkum ka jingong jong u, ka jinglong hok katkum ka ktien ka ïada ïa ki jingmyntoi jong ki trai ri trai muluk na baroh arliang.
“Ka jingpynlong kongsan ïa ka ktien Khasi ha Khasi bad Jaintia Hills kan ïada ïa ki trai ri Khasi.Kumjuh ruh dei ban pynlong kongsan ïa ka ktien Garo ha Garo Hills ban ïada ïa ka jaitbynriew trai ri trai muluk Garo,” u la ong.
U Bah Passah u la maham ba ka jingpynhiar ïa ka rukom kan pynshlur ïa ka jingtrei kaba la pynlong da ka jingwan buhai shnong bad kan pynkylla ïa ka jingbun briew.
“Kan long kaba bakla bad kaba shyrkhei ban wad kam namar ka jingwan buhai shnong.Kan don ka jingkylla kaba khraw ha ka jingbun briew.Ngi hi ngin ym pynshlur ïa ki Khasi ban buhai shnong sha Garo Hills ban dawa kam hangta namar ka dei ka jong ki para Garo jong ngi,” u la ong.
U la kyntu ïa ka sorkar ban bat ïa ka Khasi kum ka ktien ba dei ban kren marwei ha Khasi-Jaintia Hills bad ka ktien Garo ha Garo Hills bad u la kyrpad ïa ka AKHAJAC ban sngewthuh “ïa ka jingdonkam jong u pud u sam haba ar ne palat ki jaitbynriew ki ïasam ïa kawei ka jylla.”