Khluit tar u Bah Ardent ba shah kynnoh khim jingmut ha u Conrad, kop da ka jingïatainia
Shillong, Nailur 22: Ha ka sngi kaba kut jong ka dorbar synrao mynta ka sngi, ka la mih ka jingïakhluit hapdeng u Myntri Rangbah u Conrad Sangma bad u MLA ka VPP, u Bah Ardent Basaïawmoit.
Kane ka la mih haka por ba u Conrad u dang jubab ïa ka Call Attention Notice halor ki khubor kiba la mih ba ka jylla Meghalaya kadei ka jylla kaba duk tam ha ri India. Haba jubab ïa kane, u Conrad u la kdew shibun tylli ki mat da kaba kren siat bad kynthah ruh ïa u Bah Ardent ba u long khim jingmut bad uba shu wohdong beit ïa kaei kaba la leh da ka sorkar. U Myntri Rangbah u la kren pyrshah ruh ïa ka jingdawa u Bah Ardent halor ka jingpynlong palat pud ïa ki Festival ne ki tamasa. U Conrad u la ong ruh ba u she jingeh ban pynshai ïa ki briew ki bym sngewthuh.
Hamar kane ka por u Bah Ardent u la ïeng lyngba ka Point of Order, ha kaba u la ong kdew ba ki kyndon pynïaid ïingdorbar ki kren shai ba ha kaba ïadei bad ka Call Attention Notice, u Myntri udei ban jubab beit ïa ki point kiba la wanrah da ki dkhot, ym dei ban un shu jabab lut kat kaba u kwah. U MLA Nongkrem, u la ong ruh ba lada u Myntri Rangbah u kwah ban ban ïatainia u long uba la kloi ban ïatainia khamtam ha kaba ïadei bad ka jingkynnoh ïa ka jinglong khim jingmut ne ka jinglong ka jingmut jingpyrkhat. “Lada u Myntri Rangbah u kwah ban ïatai halor ka jingmut jingpyrkhat ngin iatai, namar ka jingmut jingpyrkhat jong u riewlum bad ki briew kiba la heh la sah shabar jylla ka ïapher”, la ong u Bah Ardent.
Hamar ba dang khluit ka jingïania la ïeng sa u Dr. Mukul Sangma, uba la kdew ba ki kyndon ki kren shai ba u Myntri haba u jubab ïa ka Call Attention Notice udei ba jubab beit ïa ka phang bad kam dei ruh ban jrong.
Na ka liang u Deputy Speaker uba pynïaid ïa ka ïingdorbar u la kylli na u Bah Ardent la u dang kwah ne em ba u Myntri Rangbah un dang pynshai. U Bah Ardent u la ïeng da kaba ong ba um kwah shuh ïa ki jingpynshai na u Myntri Rangbah, hynrei namar ba u Myntri Rangbah u la kwah ban ïatainia, na ka liang jong u ruh u long uba la kloi.