Da ka Legal Notice ba 20 klur dawa bai mynraiñ khmat u Lalremsanga na u Dr Mukul

Shillong, Nailur 22 : U Henry Lalremsanga ula phah da ka ‘Legal Notice’ sha u Myntri Rangbah barim bad Nongïalam ka All India Trinamool Congress (AITC) u Dr Mukul Sangma bad dawa ban siew ïa ka bai mynraiñ khmat ba T.20 klur nalor ban panmap halor ka jingkynnoh ba u dei u ‘Kingpin’ ki kam khaïi droks hapoh ka ïing Dorbar Thaw Aiñ ka Jylla Meghalaya.
Une u Nong Mizoram uba dei u Chairman ka 2B’s Group of Companies, ula dawa ïa u Dr Mukul ban siew ïa kane ka bai pyn mynrain bad ban panmap hapoh ka 7 sngi lym kumta un mudui da ka mukotduma kam bymman (Criminal) bad Civil suit pyrshah ïa u hakhmat ka ïing Bishar.
ïa kane ka ‘Legal notice’ la phah da u Bah K Kharmawphlang & Associates, Advocate and Legal Consultant jong u Henry Lalremsanga.
Kane ka ‘Legal Notice’ ka kren halor ka jingkynnoh bym shong hok bad jingkawang ktieh ïa ka long ryngïeng jong u Lalremsanga hapoh ka Dorbar Synrai jong ka ïing Dorbar Thaw Aiñ bad ka jingkren sha ki lad pathai khubor kiba mih paidbah ha ka 19 tarik bad 20 tarik Nailur, 2023. Ka la pynpaw ba kine ki jingkynnoh ki la saphriang kylleng sawdong bad buh ha ka jingma kaba bun ïa u Lalremsanga shimet bad ha ki kam ba u trei.
La pynpaw ba u Lalremsanga ula shah kem khlem shonghok ha u snem 2013 haba ïadei bad ka jingkurup ïa ki dawai ba shalan watla u don ïa ka Licence ban shalan ïa ki dawai. Ka ïing Bishar Special Court NDPS Act, Patiala House Court, New Delhi, ha ka 218 ka la pynkut ïa kane ka mukotduma da kaba ong ba duna palat ki sakhi ban pynshisha ïa ka jingpynkheiñ aiñ.
Ka Notice ka ong ba ka jingkynthoh pynjah burom, ka bym don ka jingshisha, ka la wanrah ïa ka jingsngewdiaw kaba jur ïa u Lalremsanga, ïa ka ïing ka sem jong u bad ïa ki kam ba u leh shabar ka Ri. Kane ka jingkynthoh ka la ktah ïa ka Jaidbynriew Mizo hakhmat ka pyrthei.
U Legal Council u Lalremsanga ula pynpaw ruh ba kine ki jingkynnoh ba poh dor, ki dei kiba la pynmih khnang tang ban myntoi ha ki kam saiñ pyrthei.
Nalor ki jingdawa bai mynraiñ khmat bad ban panmap, la dawa ruh ba dei ban sangeh shisyndon ha ka ban pynmih ïa kino kino ki jingkren lamler bad jingkynthoh pynjah burom ïa u Lalremsanga.
La ong ba kane ka ‘Legal Notice’ kan dei ka ruh kum ka kabu ba khatduh ban pynbeit ïa ki jingleh bakla kaba la pynjah burom ïa ka burom ka ijot jong u Lalremsanga.