Nongstoiñ, Rymphang, 11: Ka jingïatan tyllai hapdeng ki kyrtong kiba ïa aireng ha ka Election MDC ka la nang shongshit ha man la ki jaka, khamtam ha Mawshynrut constituency, namar ki don ar ngut ki kyrtong kiba dei na ka juh ka kur kata u bah Sraly Rashir u kyrtong ka HSPDP u ba ka shnong trai jong u ka dei na Umdang bad u bah Kodang Rashir u kyrtong ka Indian National Congress u ba ka shnong trai jong u ka dei na Nongdaju.
U bah Sraly Rashir u la shah jied teng kum u MDC na ka seng Congress ha u snem 2003, u ba ki paitbah jong ka Mawshynrut constituency ki la ithuh lut bad kiba la ïakynduh ha kiba bun ki kam. Ha kajuh ka por ïa u bah Sraly la kyrshan bor bah da u bah Methodius Dkhar u MLA ba mynta jong ka HSPDP.
U bah Kodang Rashir pat wat la u dang dei u kyrtong u ba dang sdang ban mih madan nyngkong ban ïaleh election, hynrei u dei pat u ba ki paitbah ki la ithuh bha namar u dei u rangïalehkai phutbol u ba tbit bad satar bha ha poh ka thaiñ Mawshynrut. Nalor kata u dei ruh u nongtrei sorkar ha ka tnad PWD.
Haba pyrshang ban twad jingmut na ki paitbah katei ka thaiñ, ki la ong ba ka jingïakhun kaba jwat bha ha kane ka kynti, ka dei ha ki shong Garo namar ba kitei ki ar ngut ki kyrtong u bah Sraly Rashir bad u bah Kodang Rashir haba ki kren ïa ka ktien Garo ka long thik kumba ki kren ïa ka ktein Khasi la jong.
Ki paitbah katei ka thaiñ ki la ong ruh ba ha Mawshynrut constituency ka jingdon ki paitbah nongshong shnong ka ïakhleh bha, namar kiba shong ha ki bynta ba shaphang shathie lam sepngi ki ïakhleh lang Lyngngam bad Garo. Ha ki bynta ba shaphang shatei lam sepngi la shong da ki Nongtrai bad ha ki bynta pdeng shaduh mihngi, la shong da ki Maram.
Ha ka jingïashong khleh ka don ka jingïadei kaba jan jong ki kyrtong bad ki paitbah ha ki ba bun ki bynta kum ha ka jingïalong shikur shi jait, shi kha shi man bad shi ba ha ïng ha sem ha kaba kan don ruh ka jingïa sngewjan, kaba kim lah ban kyntait ha ka ban ai ïa ka shi vote ka jong ki sha uno uno uba ki sngew jan.
Haba phai pat sha u bah Gardinal Sohshang u kyrtong MDC ka NPP u ba la kyrshan bor bah da u bah Gigur Myrthong MLA barim bad u ba dei ruh u MDC ba mynta uba bat ruh kum u EM hapoh ka Disitrict Council. U bah Sohshang u dei u samla rangbah u ba la shakri ïa ki paitbah hapoh ka constituency la bun bun snem bad ha kiba bun rukom, ha ka por ba u dang long u president jong Khasi Student Union Mawshynrut circle, u ba dei ruh u trai shnong na ka shnong Janepieh ka shnong kaba don hapdeng jong ka Constituency.
U bah Sranly Rongrin u kyrtong ka United Democratic Party u dei na ka shnong Nongrathaw kaba don ha ki thaiñ Umdang. U bah Rongrin ruh u dei u samla rangbah uba ki paitbah ka constituency ki la ithuh bha ïa u namar u la shakri ïa ki paitbah hapoh ka constituency la bun bun snem, naduh ba u dang long u nongïalam ka KSU bad u la bteng shuh shuh ban bat kum u president ka HYC haduh phra snem kynthih.
Uwei pat u kyrtong u dei u babu Birbor Riangtem u ba la mih ban ïakhun ïa kane ka MDC Election na ka Voice of the People Party. U babu Riangtem dei u nonghikai skul u ba la shah weng noh ha ka sorkar bad hadien ba u la shah weng u la leit ban shah thngan ban dawa na ka sorkar ïa la ka jong ka hok, hynrei kam shym la poi shaei shaei.
Watla katta ruh ym lah ban len ba da ki spah bad ki hajar ngut ki para nonghikai skul hapoh ka constituency lem bad ki paidbah, ki sngew ieit bad sngew burom ïa u namar u la long ruh u nongïalam ba hakhmat duh jong ka synjuk ki Nonghikai Primary skul hapoh ka jylla.
