Shillong, Rymphang 11: Ka Bharatiya Janata Party (BJP), kaba dei kawei na ki paralok ba ïatreilang hapoh ka sorkar MDA ba la ïalam da ka NPP ha ka sngi baar ka la kyntu ïa ka fact finding committee (FFC) ba kan aiti ïa ka kaiphod halor ka jingkynnoh ba don ka jingtih dewïong beaiñ bad ïa kane dei ban aiti hapoh ki 40 sngi.
Ha ka jingthoh, u State General Secretary ka BJP u Bah Wankitbok Pohshna u la ong, “U state president u Rikman G Momin u la thaw ïa ka fact finding committee ha ka 6 tarik mynta u bnai bad ha ka jingpynbeit kaba thymmai ïa ka, ki la don katto katne kiba la shah thung biang kum ki dkhot ha kane committee ban peit halor ka jingshah kynnoh ba don ka kam khaiï beaiñ ha Meghalaya.”
“Ïa ka committee ngi la ai por mynta 40 sngi ba kin wanrah ïa ka kaiphod halor ka jingshem jong ki halor kane ka jingshah kynnoh,” u la bynrap.
U la pyntip ba u Bernard R Marak u la shah thung kum u convener jong ka committee, u Bah Mariahom Kharkrang u secretary bad 8 ngut u Lakhon Biam, Raphius Sangma, Commanderful Sana, Karabar Tynkan, Daniella Nonglait, Darihun Marbaniang, Arun Kumar bad u Pramod Jain.
