Pynthikna u CEM ban buh ki Coaching Centre, ki jaka sumar nalor kiwei, lada shah jied biang

Shillong, Rymphang 11: U CEM ka KHADC u Bah Pynïaid Sing Syiem ha ka sngi baar u la pynthikna ban buh ïa ka jaka ai jinghikai (coaching centre), ka jingai jingsumar ïa kiba dih drok (rehabilitation centre), ban kyntiew ïa ki kam sengkam lajong, ki kam ïalehkai bad ban kyntiew ïa ki jaka sumar lada u la shah jied biang kum u MDC na Nongthymmai constituency.
Haba pynpaw ka jingsngewskhem ba un jop biang ïa ka elekshon sha KHADC ka ban long ha ka 21 tarik mynta u bnai, u Bah Syiem u la ong, “Lada nga shah jied, ngin sa buh ïa ka coaching centre ha Nongthymmai constituency, ka ban long kaba ïa ryngkat bad ki centre kiba don ha nongbah Delhi. Kane ka centre kan ai ka jinghikai kaba biang na ka bynta ki samla jong ka constituency ban pynkhreh ïa ki na ka bynta ki eksam competition bapher bapher. Ngi sa leh namar ngi la ïohi ba bun na ki paidbah, khamtam kito kiba wan na ki longïing kiba duk ba kyrduh ki bym lah ban leit sha ki coaching centre kiba don shabar ka jylla.”
“Ngin pynshlur ruh ïa ki samla kiba kwah ban sengkam lajong khnang ba ym tang ba kin ïoh myntoi ha ka ïohkam ïohjam hynrei ba kin lah ban aikam ïa kiwei pat. Nalor kane, ngi kwah ban kyntiew ïa ki kam ïalehkai na ka bynta ki samla jong ngi. Kane ka rai la shim hadien ba la ïasyllok bad kiba bun ki samla khamtam kito kiba dangdei ki nongthep vote ha ka sien kaba nyngkong,” u la ong da kaba bynrap, “Ngam don jingartatien ba lyngba ki agenda jong ngi ki paidbah kin sa ai ki vote na ka bynta jong ngi ha kane ka elekshon ban wan.”
Shuh shuh u Bah Syiem u la kular ban ïakren bad ka sorkar jylla halor ka jingdonkam ban pynbha ïa ki jaka sumar bad ban kren ruh halor ka jingkyrduh ka umbam umdih ha kane ka constituency.
“Nalor ban wanrah ïa ki aiñ kiba treikam halor ki phang bapher bapher, ngi don ruh ka jingkitkhlieh ban wanrah ki kam pynroi hapoh ka constituency. Lada ngi ïoh ka lad, nga shim khia ruh ïa kiba bun ki kam ba mad da ki paidbah ka constituency bad ka sorkar jylla,” u la ong da kaba bynrap, “Ki don ki shnong ha ka constituency, ha kaba ki nongshong shnong ki hap ban thied ïa ka um ban dih bad ki don ruh ki briew ki bym lah kot bor ban leit sha ki jaka sumar ba bha na ka bynta ki jingpang bapher bapher. Namar kata ngi donkam ban pynbha ïa ki jaka sumar ha kane ka constituency.”
“Ha kajuh ka por ngi kwah ruh ban buh ïa ki jaka counselling bad rehabilitation centre na ka bynta kito ki bym kot bor kiba la ngat ha ka jingkyrni dih drok. Ngi kwah ban pynthikna ba ki dei ban ïoh ka jingsumar kaba biang. Nalor kane, ngi kwah ruh ban buh ïa ka skill development institute ban hikai ïa ki samla ha ki kam bapher bapher khnang ba kin ïohkam ïohjam,” u la bynrap.