Khlong ki pulit ïa ki met iap kiba iap ha thliew dewïong ha EJHD

La phah leh post mortem sha NEIGRIMS hospital

0

Khliehriat Kyllalyngkot 13: Ki pulit jong ka Ladrymbai Outpost mynta ka sngi ki la leit ba khlong noh ïa ki lai tylli ki metiap ba la tep ha shnong Musniang, kine ki lai ngut ki dei kiba iap hapoh thliew dewiong myn ha ka 9 tarik mynta u bnai bad tep noh ïa ki ha ka 10 tarik bad kat haduh mynta ruh ki pulit kim pat lah ban pyntikna la kitei kiba iap ki dei ne em ki nongtih dewïong.
Na ka liang u Superintendent of Police East Jaiñtia Hills District, u Jagpal Singh Dhanoa, u la ïathuh ba ka tnat pulit ka la leit pan jingbit na ka ïingbishar District Court East Jaiñtia Hills District, kumta ka ïingbishar ka la ai jingbut ban khlong ïa ki met iap bad ïa ki.met iap la rah sha NEIGRIMS hospital Shillong ban leh ïa ka post mortem ban dup tip bad shai ïa ka daw ka jingiap namar ka jingiap jong ki lai ngut kaba pynsah umdum (died under mysterious circumstances)
Kum ban shu phai dien, Ki pulit jong ka East Jaiñtia Hills District, myn ha ka 10 tarik mynta u bnai ki la ujor da ka ejahar (Suo Motu Case) halor ka jingiap ki nongtih dewïong ha East Jaiñtia Hills District kaba long katkum ba la paw ha ki pathai khubor, na ka liang ki pulit ki la pynlong ïa ka jingtohkit bad ki dang wad bniah halor kane ka jingjia.Kumba la paw ha ki pathai khubor, la ong ba ki la don haduh lai ngut ki nongtih dewïong kiba la iap hapoh ka thliew dewiong kaba don ha elaka Rymbai, napdeng kiba khlad u wei u dei uba la tip kyrteng kum u (L) Ten Siangshai, uba na ka shnong Musniang bad ym pat shym la tip kyrteng ïa ki ar ngut kiwei pat kiba la iap ha ka thliew dewiong .
Na ka liang ki bor pulit ki la pyntreikam noh da ki kyndon 160 bad 91CrPC bad ai jingtip sha baroh ki rangbah shnong bad kin wad jingtip bad pynshai lem halor ka jingjia kumba la paw ha ki pathai khubor, ha kajuh ka por ki pulit ki la wad jingtip ruh na baroh ki PHC bad ki CHC bad pan ia ki kaiphot jong ki met iap, ki la phah ruh ia ka kynhun pulit sha ki shnong bapher bapher khamtam ha shnong Musniang ban wad bniah ia kane ka jingjia, ki la buh ruh ia ki briew (source) ban ai jingtip lem halor kane bad kat haduh mynta ki pulit ki dang pynlong ia ka jingwad bniah abd tohkit ban ioh jingtip shuh shuh halor kane ka jingjia.

Leave A Reply

Your email address will not be published.