Nongstoiñ, Lber 20: U Paiem Phlowel Syiem, Syiem ka Hima Nongmynsaw Syiemship ryngkat ka jingïasynranlang u bah Donbok Snaitang joint Secretary ka Hima kumjuh ruh u bah Phyrnailang Ïawphñiaw, ha ka sngi balang ki la leit ban ïakynduh ïa u Bikram R Marak Superintendent of Police ka West Khasi Hills District, ban ai ïa ka jingthoh namar ka jingbym pat leh ei ei ka tnad pulit ïa ki briew kiba donkti ha ka ban ktah kti ïa u Paiem Phlowel ha u snem ba la dep.
Kumban shu pynkynmaw katei ka jingjia shah ktah kti ïa u Paiem, ka dei kaba la jia ha ka 22 tarik u Naiwieng 2024, ha kaba kumba katto katne ngut ki briew ki la lum da ka kynhun ba la lamkhmat da u bah Passtar Nongshillong, ki la rung jubor ha ka ophis treikam u Paiem ka Hima Nongmynsaw kaba don ha Ïew Langpih.
Haba la rung shapoh ki la shoh la dat ïa utei u Paiem khlem ka jingïatiplem wat haba u la tymmen ka karta ruh. Hadien kata ka Hima ka la ujor da ka ejahar ha Langpih Police Outpost, katba kat haduh kane ka khyllipmat na ka liang jong ki pulit kim pat shim kam ei ei. Ki la ong ba wat ha ka sngi balang haba la leit ban ujor ha u SP, wat u SP ruh u dang ong pynban ba un da wad bniah shwa.
Kane ka jingbym shimkhia jong ki bor jong ka aiñ khlem pep kan ai mynsiem shuh shuh ïa kiba khlem akor ban shlur ïa ka ban shoh briew, namar balei wat haba la dep ban ai da ka ejahar naduh mynshem snem, phewse khlem pat kem ïa ki nongshoh briew wat haba la bïang ki sakhi satar da ki dur khih.
