Nongstoiñ, Nailar 19: Ki jaka ai jingsumar sha ki paidbah nongkyndong ha West Khasi Hills District lyngba Sub Centre ki la don bun bha ha ki shnong bapher bapher jong kane ka District. Ki la long ruh ka jingmyntoi bad jingkyrkhu ïa ki paidbah, hynrei katkum ka jingïaid jong ka por bad ka jingroi ki nongshong shnong, kine ki jaka sumar lane jaka ai dawai pat ki ïaineh sah kumjuh. Kumta la donkam kyrkieh ban kyntiew kyrdan noh sha ki kyrdan ba kham halor.
U Bah Despitol Sun President sengkmie ka seng WKSU ha u kyrwoh khubor u la ong, “Ka sorkar Jylla ka la dei ban phai khmat sha kane ka bynta, da kaba kan pyrshang noh ban kyntiew kyrdan ïa ki Sub Centre sha ka kyrdan jong ka PHC. Kumba long mynta wat ki PHC ki la shlei da ki nongpang bad ki nongwad dawai. Hynrei, lada kyntiew kyrdan noh ïa ka Sub Centre sha ki PHC, kan ïarap pynsting ïa ka jingban khia jong ki PHC lane wat ha ki Civil Hospital”.
“Na ka liang ka tnad sorkar lyngba ka Directorate of Health Service, ki dei ban leh ei ei ban thaw buit thymmai ha ka ban kyntiew kyrdan noh ïa ki Sub-Centre sha ki PHC lane ki Health Wellness Centre”.
“Ka seng WKSU sengkmie, ka la leit buddien na ka tnad treikam jong ka DM&HO Nongstoiñ lyngba ka Head Assistant, la lap ba ka tnad ka koit ka khiah na ki District ka la ïaid shakhmat, hynrei ka ap mynta sa na ka jingshimkhia jong ka sorkar bad tnad DHS”.
“Ka seng ka dawa na ka sorkar lyngba ka tnad DHS Shillong ba ka dei ban ai jingmynjur noh katkum ba la phah proposal da ki District Health & Family Welfare, kata ban don noh la ki jong ki Sub-Centre Dikynthoiñ bad Marskuiñ. Nangta ban kyntiew kyrdan noh ïa ka Kyrshai na ka sub-centre sha ka PHC/HWC, kum ba la dep phah proposal da ka tnad ba dei peit na Nongstoiñ”.
“Ka sorkar ka dei ban kyntiew kyrdan noh na ki PHC sha ki CHC kita ki long ïa ka Rambrai, Kynrud, Aradonga bad Myriaw. Nangta ka tnad DHS, ka dei ban mang tyngka ha ki kam ha kaba ïa dei bad ki nongtrei bad ki jingdonkam ba bun ha ki sub-centre kum ïa ka Mawlangkhar, Nongthyllep”.
“Kumjuh ruh ban mang tyngka noh ha ki kam jong ki nongtrei ha ki sub- centre kiba la dep approved ban kyntiew kyrdan sha ki PHC/HWC, kum ïa ka Seiñduli, Nongkynjang West Khasi Hills bad Mawpud ha South West Khasi Hills”.
“Halor kitei ki mat, ka sorkar jylla bad ka DHS ki dei ban tih bniah ïa kine ki kam kiba dang sahteng ha kaba ïa dei bad ki mat ai jingshakri sha u paidbah ha kaba ïa dei bad ka koit ka khiah”, u la ong.
“Ka seng ka kyrpad ruh ïa ki DM&HO jong ar tylli ki District, ba kin buddien biang sha ka tnad ba ha khlieh duh kiba khmih ïa kine ki lad pynroi ha ki tnad ka koit ka khiah jong ki ar tylli ki thaiñ, khnang ba ka jingai jingshakri ïa u paidbah kan long kaba ïa hap kyrdan bad ba paka”, ong u Bah Sun President ka seng WKSU.
