Shillong, Jymmang 27: U Myntri Rangbah ka Jylla Conrad Kongkal Sangma hynne ka sngi thohdieng ula ong ba ki Nongïalam ka Bharatiya Janata Party (BJP) na Delhi kim pat phah satia ïa kano kano ka shithi ba pynpaw ïa ka jing donkam ban iatai hakhmat u paidbah bad ban tohkit CBI ïa ki jingkynnoh bamsap ha Jylla.
“Ym pat don mano mano ruh ba thoh sha nga. Ka High Command ne Nongïalam na Delhi kim pat phah satia ïa kano kano ka shithi ba ïadei bad kane” ong u Conrad haba ïakren bad ki lad pathai khubor haba kylli halor ka jingkop u MDC ka BJP na Tura Bernard N Marak ban iatai hakhmat u paidbah ïa ki kam bamsap bad ka jingdonkam ban thung ïa ka jingtohkit CBI ha ki jyrsieh bapher bapher bala kyndang da ka BJP.
Une u MDC ula ong ruh “U CM uba thung, u CM uba weng bad ngi long kiba la khreh ïa kano kano ka jingialeh. Ka pisa bad ka bor kam dei kaba kut ha ka kam saiñ hima sima hynrei dei ki Nongïalam kiba biang”.
Haba kyntait ban kynthoh ïa ki jingkynnoh ba bun bala sei madan da un eu MDC ba marwei ka BJP, u Conrad ula ong “Ngan nym ïoh treikam satia lada nga hap shong ban jubab ïa kum kine ki jingkynnoh”.
U Myntri Rangbah ula ong ruh ba ka shong ha ki Nongïalam ka BJP ba kin leh eiei pyrshah ïala ki jong ki Dkhot bad ba ym don eiei ruh ban ong ïa kaei ka sienjam ba ki dei ban shim.
Haba pynpaw ba dei ki Nongïalam ka BJP na Delhi kiba rai ban kyrshan ïa ka Sorkar Meghalaya Democratic Alliance (MDA), u Conrad ula ong “Tad lada ki Nongïalam na Delhi ki bthah ïa nga ban leh ïa kane…leh ïa kata, kane ka long da kumwei pat. Hynrei nga sngew ba u riew shimet un kynnoh bad un ujor ka dei ka kam jong u bad ngam don eiei ban ong ïa kata”.
Dang shen, u National Vice President ka NPP bad Symbud Myntri Rangbah ka Jylla Bah Prestone Tynsong ula ther tyngeh ïa ka BJP halor ka jingleh arsap da kaba ïaid ïalap pyrshah ïa ka sorkar MDA lyngba ki social media wat la ka dei kaba iadonlang ha ka sorkar.
