Khlem da tip, kynnoh ki seng saiñpyrthei ba shim ram ka sorkar haduh 1500 klur na bynta ka skim FOCUS : CM

Shillong, Nohprah 17 : U Myntri Rangbah ka jylla, Conrad K Sangma u la khyrwit tyngeh ïa ki riew shimet ne ki seng saiñpyrthei kiba kynnoh ba ka sorkar ka shim ram haduh kumba 1500 klur na ka bynta ka skim FOCUS bad FOCUS+.
Haba kynthoh tyngeh ïa kane ha ka jingïalang paidbah ha Pynursla, u Conrad u la ong, “Don ki sengsaiñpyrthei kumjuh ki riewshimet kiba kynnoh ba la shim ram haduh 1500 klur tyngka da ka sorkar jylla na ka bynta katei ka projek FOCUS.”
U ong ruh ba ka long kaba sngew danda ba kitei ki nongkynnoh kim tip satia ba ka mang tyngka baroh na ka bynta katei ka projek FOCUS bad FOCUS + kadei tang 400 klur tam ym haduh 1500 klur tyngka.
“Kiei kiba kynnoh kim tip satia ba haduh katno la mang na ka bynta katei ki skim hynrei ki la shu antad. Haba kim don ïa ki jingtip kiba biang ki dei ban kiar na kaba kren ïa kum kitei kiei kiei,” bynrap biang u Myntri Rangbah.
Shuh shuh u la ong ruh ba kaei ba ka sorkar ka trei mynta ka long kyrpang na ka bynta ki 4.5 lak tylli ki longiing longsem kiba bun dei ki longiing kiba kham duna ka ïoh ka kot ha ka jylla. U ong ruh ba ki don ki longiing kiba kwah ban rep ban riang hynrei kim donpat ïa u symbai ban leh kumta, u ong ba don ruh ki bym don pisa wat tang ban pynkit ïa ki mar rep ban leit die sha ïew.
“Kine baroh ki skim kidei kyrpang naka bynta kum kitei. Kumta ban buh jingkylli ïa ka sorkar ba ka leh ïa kine kiei kiei baroh ka long kumba phi buh jingkylli ïa ka jingïarap sha kiba duk na kiba duk tam kiba don ha ka jylla.”
Nalorkata, u Myntri Rangbah u la ïathuh ruh ba mynta ki la don haduh kumba 4lak ngut ki longkmie kiba treikam kum ka kynhun ha ki Self Help Group. Da kaba ïaroh ïa ka jingnang bun ki kynhun jong ki longkmie kiba treikam kum ka kynhun, u Myntri Rangbah u lapynkynmaw ruh ba dang ha ki sdang snem jong u 2018 ki don tang kumba 40hajar ngut hynrei mynta pat ki la kiew bun shah.
“Tang ha ki saw snem ka jingtreikam, ka jingdon ki longkmie ha ki SHG ki la kiew na ka 40hajar sha ka 4lak tam ne jan kot 4.5 lak ngut ki longkmie,” u la bynrap shuh shuh. Kumta u la ïathuh ruh ba ka sorkar jylla naduh u snem 2018 tad haduh mynta ka la dep ban mang da ki spah klur tyngka na ka bynta ban pynkup bor shuh shuh ïa kitei ki kynhun kiban kylla long ki nongkyntiew ïa ka ïoh ka kot ha ka jylla baroh kawei.
Ha katei ka jingïalang kaba long ha Pynursla u Myntri Rangbah u lasam ïa ka song pisa kaba 33.40 lak tyngka lyngba ka FOCUS+ sha ki 668 tylli ki longiing, nangta 11.36 klur tyngka sha ki 950 tylli ki SHG bad 80 tylli ki Village Organisation.
La sam ruh haduh 2000 tylli ki khun sniang sha ki 400 ngut ki nongïoh jingmyntoi, bad ruh ka jingsam ïa ki khun syiar kuroiler ba bha jait sha ki 100 ngut ki nongïoh jingmyntoi.