Shillong, Nailur 01: Kan long kaei kaei kaba phylla ba ka sorkar jylla ka khlem la aiti ïa ki Utilization Certificate (UC) halor ki Grant bapher bapher ba la buh da ka por, bad kumba ka long mynta ka Meghalaya ka khlem pat lah aiti haduh 454 tylli ki UC ba kot haduh T. 3436.01 klur kat haduh ka 31 tarik Lber, 2023, ia kane ka pynpaw hapoh ka kaiphod jong CAG kaba la ïathuh hapoh ka Dorbar Synrai dangshen.
Kane ka jingsei madan da ka kaiphod Comptroller and Auditor General jong ka India ka la long ha ka State Finances Audit report jong u snem ba kut ha ka 31 tarik Lber, 2023 ba la wanrah ha ka Dorbar Synrai ba dang shu kut shen ha ka sngi Thohdieng jong u bnai ba la dep.
Ka kaiphod ka ong ba hapdeng u 2022-23, haduh 726 tylli ki UC ba shongdor T. 4,459.58 klur (307 ba T. 2373.51 klur ba sah naduh ki snem ba la leit bad 419 tylli ki UC ba T.2086.07 klur kaba kut ha u 2022-23) ki dang sahteng ban aiti haduh kine ki sngi.
Ka kaiphod ka ïathuh ruh ba napdeng kine, tang 37.46% (272 UC kiba kot T. 1023.57 klur) la dep ban aiti.
Nalor kane, 14 tylli ki UC ba kot T.1.28 klur na ka bynta ki grant ba la ai ha u 2022-23, ki ban sa kut ha u 2023-24 ruh lah dep ban aiti ha u 2022-23, ong ka kaiphod.
