Shillong, Nailur 01: U MDC ka Tura u Bernard N Marak u la phah da ka shithi sha u Myntri Rangbah ka jylla u Conrad Sangma, ha kaba ïadei bad ka jingpyndonkam bakla ïa ka pisa ne ka fund da ki Executive Committee bad kumjuh ruh ka jingbym pyntreikam ïa ka jingmynjur kaba la ïakren teng bad ka ANVC ha kine ki 10 snem ba la leit.
Ha ka shithi na ka liang utei u MDC u la ong bad ïathuh ruh haba ïadei bad ka jingkyrduh pisa jong ka GHADC, ha kaba ki Executive Committee kiba la leit ki la pyndonkam bakla ïa ka pisa kaba dei na ka bynta ka GHADC.
“Ka jingdawa jong ki nongtrei ha kaba ïadei bad ka 5th Pay Commission ka long kaba dei bad nga ngeit ba phi la tip ïa ka jingpynbna ba la pynmih da u CEM barim ka NPP jong ka GHADC ha u snem 2018 ban pyntreikam noh ïa ka Fifth Meghalaya Pay Commission vide no F(PR)-49/2017/192 kaba la ai kopi lang,” ong u MDC.
U la ïathuh ruh ba lyngba kane ka jingpynbna baroh ki tnat la bthah ba kin pynkhreh ïa ka jingsiew bad ki allowance jong ki ophisar bad ki nongtrei ha kaba ïadei bad ka jingpynbeit thymmai ïa ka jingsiew kaba long ruh katkum ka Meghalaya Services (Revision of Pay) bad kiwei pat ki kyndon kaba dei ban sdang naduh u bnai Ïaïong jong u snem 2018. U la ong ruh ba ïa kane ka jingpynbna khlem don satia kiba burom bad bud ruh da kiwei ki Executive Committee kiba la leit.
“Naduh u snem 2018 haduh mynta ïa ka mang tyngka la pynkhreh bad mynjur hapoh ka 5th Pay Commission Scale hynrei ki nongtrei ki dang ïoh hi ka tulop kaba hapoh ka 4th Pay Commission, Nga kwah ban pyntip ïaphi hadien ba la soi ïa ka Peace Pact da ka ANVC group, ka sorkar pdeng bad ka sorkar jylla ha u snem 2014, la mang kumba T. 100.71 klur kaba dei ruh ka special package bad kiwei pat ki jingmang ha ki snem ban wan ha ka jingsynshar jong ka NPP ha GHADC,” ong u MDC.
U la ong ruh ba ka pisa kaba la mang lyngba ka jingïamynjur ki dkhot ka ANVC kim shym la ïoh jingtip ne ba kin don hapoh ka monitoring committee da ka sorkar jylla wat hadien ba la rai hapoh ka jingïalang khmih bniah kaba long kaba donkam bha na ka bynta ka ANVC.B kiba la long ruh dkhot. La ong ba ïa ka pisa kaba dei ban pynlait kam don hapoh ka Finance Commission bad ïa kane la pynkheiñ pynban da ka jylla ha kaba na kane ka la lam sha ka jingshah pyndonkam bakla ka pisa da ki Executive Committee kiba la leit kiba la pynphai noh na ka pisa kaba dei T. 53 klur jong ka sorkar pdeng ban siew ïa ki tulop ki nongtrei ha kaba ha ka jingshisha ka khlem don satia kata ka jingsiew sha ki nongtrei.
“Wat ka 40% jong ka pisa kaba la mang ha ka kyrteng jong ki project ki la jah noh napoh ka Council account khlem da la siew sha ki contractor. Kumta ka donkam ka jingtohkit jong ki bor ba nalor ha kaba ïadei bad kane ka jingjia. Kaba khatduh kaba nga kwah ban ong ka long ba dei ban shim khia ïa ka jingïasoi jingmynjur bad ka ANVC kaba la soi ha ka snem 2014 bad ban khmih ruh ba kane ka kam kan ïaid katkum ka jingmynjur. Kumta na ka liang jong nga, nga kyntu ïa phi kum u Myntri Rangbah ka jylla ban peit ïa kane ka jingeh na ka bynta ka bha ka miat jong ki nongshong shnong ka thaiñ Garo kiba la duh ïa ki lad jingmyntoi na kane ka jingïamynjur. Na ka liang jong nga ruh ngan pyrshang ban ïarap ïaphi ban pynbha ïa kane ka jinglong jingman kaba lah ruh ban lait na ka jingpynkhyllem ïa ka GHADC,” ong u MDC ka Tura.
