Shillong, Kyllalyngkot 20 : U bah W.R Marbaniang ba ju khot ieit da baroh kum u bah Bill Richmond uba la shongthait kum u Director General of Police (DGP) ka jylla Meghalaya ba shong ba sah ha Nongrimbah, Laitumkhrah, u la khlad noh na kane ka pyrthei ha ka 20 tarik Kyllalyngkot 2026. U la dap 75 snem ka rta.
Ka jinglehniam ba khatduh ïa u kan long ha ka 22 tarik Kyllalyngkot 2026 ha la ïing ha Nongrimbah, ha ka por 11 baje mynstep bad hadien kane yn sa rah ban leit onthang donburom ïa ka met jongu ha ka shnong ba la kha ïa u ha Laitkroh, Mawjrong.
Ka jingkhlad ba kyndit jong u ka la jia tang hadien khyndiat sngi ba u la kem pang. La pynkit ïa u sha Super Care Hospital ha ka Sngi Thohdieng bad khlad noh mynta ka Sngi Ba Ar.
U bah W.R Marbaniang u la shakri ha ki kyrdan pulit bapher bapher kum u ophisar naduh ki kyrdan Commandant, SP, DIG, IGP, Addl.DG bad shimti kum u DGP naduh ka 31 tarik Kyllalyngkot haduh 21 tarik Lber 2007.
Ha ka por ba u shimti kum u DGP ki artylli ki kynhun kieng tiar ha ka jylla ka HNLC bad ANVC ki dang kiew rasong bha bad ha ka jingïalam bad ïatrei lang bad ki ophisar ki la lah ban ïakhun pyrshah ïa kine ki seng. u la shimti ruh kum u Director General jongka Meghalaya Home Guard. U la long uwei na ki pulit ophisar ba trei shitom ban seng ïa ka 1st MLP Battalion ha Mawiong, 2nd MLP Battaion ha Goeragre, hajan Tura. U dei u pulit Ophisar uba ïoh ka jingieit bad jingburom na baroh ki pulit ophisar namar u dei uba sngewrit bad uba sngewtynnad ban ïa biria bad ki para pulit ophisar haba ïoh lad ban ïa shongkai.
U la ïehnoh shadien ïa i lok I kong Enid Richmond Basaiawmoit, u khun shynrang William Richmond Basaiawmoit, khun kynthei Lorina Richmond Basaiawmoit bad ki arngut ki pyrsa kurim . U William Richmond u dei ruh u nongïalam bad nongrwai jongka Choir ba pawnam ba la seng da u Bah Neil Nongkynrih (Bam Kwai ha Dwar U Blei) ka Shillong Chamber Choir.
