Khliehriat, Risaw 16 : Ka jingtbit bad ka sap ïakhun kti ba kyrpang jong kawei ka samla na Tluh kaba hap ha East Jaintia Hills District, ka la shu sep ei khamakha tang na ka daw ba kam kot bor ban pyndap nalade ïa ki jinglut jingsep ban leit aireng sha ka lympung kaba kham heh kaban long ha Moldova kaba ha dewbah Europe.
Kane ka samla kadei kaba la tip kyrteng kum ka Sinity Lutmon Kympat, 29 snem kadei ka khun jong ka Kong Blandina Kympat bad Bah Precious Malang.
Haba phai sha ka samla Sinity Lutmon, kane ka samla ka dei kaba la pyndep ïa ka klas IX na kawei ka skul jong ka Balang Catholic na Umbir (Ri Bhoi District), ka Ferrando Speech and Hearing Centre Umbir, ka skul kaba ai jinghikai ïa kito kiba don jingthut ha ki dkhot met khamtam kito ki bym nang kren bad ka la pyndep pat ïa ka klas X na ka NIOS (National Institute of Open Schooling).
Lah ban ong ba watla kam lait ban kren hynrei ka dei pat ka samla kaba don ka jingnang jingstad ha ka thoh ka tar, kaba sngewtynnad ban tip ba ka dei pat ka samla kaba sngewtynnad bad kaba ju ïashimbynta bynta bha ha ki jingïalehkai sports bad ka la ju ïoh khur ruh shibun bha ki syrnot bad ki medal ha kiba bun ki lympung bad rynsan ïalehkai sports bad ka la ju leit ruh ban ïashim bynta ruh ha ki jingïakhun kti (Armwrestling) ha ki rynsan bapher bapher wat shabar ka jylla ruh.
Katkum ka jingïathuh jong ka hymmen, ka kong Grosy Mary Kympat la ong ba ka samla Sinity lutmon Kympat, hadien ba ka la jop na kawei ka lympung ba la pynlong ha Shillong, ka 33rd Annual State Level Armwrestling, ka la shah jied bad leit ïa shimbynta sa ha nongbah Guahati bad hadien kane ka la leit sa sha kawei ka lympung kaba ha Nagpur bad ka la shah jied ruh sa sha ka lympung National Games of the Deaf, ha Aurangabad (Mharashtra).
La ïathuh ba man la ki rynsan ka ju ïoh rah ïa ka nam lahduh, kumta na ka liang ka Meghalaya Arm Wrestling Association (MAWA) ka jied ruh ïa ka samla Sinity lutmon Kympat ban leit ban ïa shim bynta sa shabar ri, kata sha Moldova, ka ba don ha ka dewbah Europe, hyntrei na ka daw ka jingbym kot bor na ïing na sem, namar ba hap ban pynlut hi na ïing na kata ka daw ka samla Sinity lutmon Kympat kam shym la ïoh shuh ka lad ban leit sha Moldova.
Haba kylli na ka samla Sinity lutmon Kympat, kata da kaba shu kren da ki kti ne ki sign language, katei ka samla ka la pynpaw ba ka angnud bha ban long ka nongïakhun kti ne armwrestling bad ruh ban nang ïaid shuh shuh sha khmat ha kane ka sap ïakhun kti ba ka don.
Ka la ïathuh ruh ba ka sngewtynnad wat ha kiwei kiwei ki jait jingïalehkai sport ruh bad ka ju ïashim bynta ruh ha kiba bun jait ki jingïalehkai sport naduh ki por ba ka dang don ha katei ka skul ha Umbir, kum ka javelin throw, ka ïa kawang shotput, ki race, ka Boxing bad kiwei kiwei ki jait sport bad ka ju ïoh ruh ïa ka nam lah duh barabor bad ïoh khur bun tylli ki medal bad ki syrnot.
La ong ba ka samla Sinity lutmon Kympat, ka don bynta lang ruh ha kawei ka group whatssap jong ki nonglehkai armwrestling bad kane ka ju pynkhih mynsiem bha ïa ka kum ka nongïalehkai armwrestling, na ka liang kiba ha ïing ha sem ruh bunsien ki ju ai mynsiem ïa ka ba kan leit ban ïa shim bynta ha ki rynsan ïakhun kti bapher bapher bad ki sports bapher bapher kum ha Shillong, ha Guahati, ha Nagpur bad ha Mumbai bad ha man ki rynsan ka ju khur ïa ka nam lah duh.
Kumba paw, ka dei ruh ka samla kaba don kata ka bor met kaba khlaiñ bha ban ïa tynjuh bor bad kiwei ki nongïalehkai sport.
Katba ka hynmen jong ka, ka Kong Eladshuh Kympat, kane ruh ka dei ka bym da lait bha ban kren bad ka long pat ka briew kaba ju pynpaw beit da ka khmat phuhsamrkhie ïa baroh bad ka don ka sap ha ka shuh jaiñ bad ka thaiñ jaiñ bad baroh ki briew ha shnong ha thaw ki ieid bad sngewtynnad bha ïa ka namar ka jinglong jong ka kaba dap da ka khmat phuh samrkhie bad ki ju wan ruh ban phah suh jaiñ ha ka man ka por.
Ka long kaba sngewtynnad ban tip ba watla ka Kong Eladshuh kam da lait bha ban kren bad watla kam shym la ïoh kano kano ka jingkyrshan hynrei ka pyrshang pat ban ieng hala ki jong ki kjat ban kamai da ka kam suh jaiñ bad thaiñ jaiñ. Ka la ïoh ïa ki jinghikai ha ka suh ka thaiñ dei ha ka por ba ka dang leit skul bad sah hostel ha Umbir ha katei ka skul kaba ai jinghikai ïa kito kiba don jingthut ha ki dkhot met, kito ki bym nang kren bad ka kong Eladshuh kympat, ka la ïoh ruh ïa ka syrnot na kane ka shlem ai jinghikai ha kaba ïadei bad ka suh ka thaiñ jaiñ.
Na ka liang ka kong Badashisha Dkhar, kaba dei kawei na ki nongshong shnong jong ka shnong Tluh East Jaiñtia Hills District, ka la pynpaw bad ong ba kine ki samla don sap kiba dei shi para, shisha ki donkam ban ïoh ki lad ki lynti ban kyntiew ïa ki sap ki phong jong ki.
Ka kyntu ïa ki bor ba dei peit kum ki tnat sorkar kiba khmih kyrpang ïa kiba kum kine kiba don jingduna ha ki dkhot met kiba dei kita ki nongshong shnong ba kyrpang bad kiwei kiwei ki Agency ne ki kynhun ruh ba kin sngewbha ban phai khmat lem sha kine ki samla kiba na shnong Tluh kiba donkam shisha ka jingïarap bad jingkyrshan ban kyntiew ïa ki ba kin kiew shaphrang ha ki kam ba ki trei bad ha ki sap ki phong ba ki don ba la ai kyrpang da u Blei.
