Nongstoiñ, K’lyngkot, 22: Ka jingdon ki Tower Mobile ha ki shnong bapher bapher ka dei ban ai jingmyntoi ïa ki paitbah, phewse kam long kumta kumba la thrang la angnud da ki paitbah. Ïa kane la sakhi hapoh ka Shnong Mawmarin kawei na ki Shnong kaba don hapoh West Khasi Hills District.
Ki nongïalam shnong jong ka shong Mawmarin ha ka jingïalam jong u Sordar Shnong Bah Brocklin Lyngdoh ryngkat ki rangbah jong ka shnong, ha ka 20 tarik ki la leit ban khang tala noh syndon ïa u Tower Mobile jong ka Company Airtel u ba don hapoh ka shnong Mawmarin. Ka daw ka long namar ba utei u Tower Mobile Airtel u ba don hapoh katei ka shnong, um lah ban ai ka jingshakri ne ka jingmyntoi ïa ki paitbah.
Na ka liang ki nongïalam shnong ki la pyrshang ban leit ai jingthoh bad pyntip sha katei ka company bad wat sha u DC ka West Khasi Hills ruh, ba un shimkhia na bynta ban peit lem ïa kane ka jingeh jong ki paitbah nongshong shnong.
Ha ka 6 tarik mynta u bnai ki bor ba dei peit ïa katei ka company Airtel ki la phah wan ban ïakynduh ïa ki nongïalam shnong hapoh DC ophis ha la por 1 baje, hynrei ïalade ki briew jong katei ka company ki khlem wan poi.
Kane ka jingleh jong katei ka company ka long ka jingkheiñ troiñ ïa ki nongïalam shnong. Kumta dei ha ka 18 tarik mynta u bnai ba na ka liang ka Executive Dorbar Shnong, ka la rai ba ïa mynta shi por yn khang tala noh shuwa ïa utei u Mobile Tower ka company Airtel u ba don hapoh ka shnong Mawmarin, tad haduh ba ka company kan shimkhia halor kane ka jingeh.
Ka Executive Dorbar Shnong kan sa phah ka jingpyntip sha ka MeECL ruh ban ai ka jingtrei lang bad ka shnong ha kaba ïadei bad ka jingai connection light ïa utei u Tower Mobile.
