Khang tala ka FKJGP bad SMB bun tylli ki dukan khaïi be-aiñ khlem licence ha Keating Road

Shillong, Nailur 26 : Ka Federation of Khasi Jaintia & Garo People (FKJGP) ryngkat bad ka Shillong Municipal Board (SMB) ki la khang ta la ïa bun tylli ki dukan jong ki bar Jylla, kiba treikam bad khaïi be-aiñ khlem ki kot ki sla ba donkam na ki bor ba dei khmih, kiba don ha ka thaiñ Keating Road.
Ka FKJGP ka la pynlong ïa ka jingkhynra ba kyndit hynne ka step sngi Ba-ar ïa ki dukan bar Jylla ha Keating Road bad shem ba bun bah ki dukan ki la plie bad treikam khlem ka Trading Licence bad Labour Licence. ïa kane ka jingkhynra la pynlong da ka FKJGP Malki Circle ha ryngkat ka jingïadonlang ki Nongïalam na ka Sengkmie bad ki Nongtrei ka Shillong Municipal Board (SMB).
Kane ka jingkhynra ka la sdang naduh ka por mynstep bad kiba bun ki dukan kiba shah khang khyrdep ki dei ki dukan die tiar kali bad ki karkhana shna kali.
Ka Seng ka la ai ka jingmaham kaba tyngeh haba ban jur ba ka seng kan ym ailad ban don ki dukan ne ka jingleh business ki bar jylla khlem da shim ïa ki jingbit bad don ïa ki kot ki sla kiba biang ba ïoh na ki bor khmih.
Hynrei, kane ka jingkhynra ka FKJGP ka la shah pynsangeh noh da ka jingwan tuklar jong ka Tnad Pulit. Ki bor Pulit ki la kyrpad ia ki Nongïalam ka FKJGP ba kin kiar na ka jingkhang khyrdep jubor ïa ki dukan haba kdew ba ka seng ka khlem ïoh jingtip na ki bor khmih ban leh ïa kane nalor ba ki la pyntip ruh sha ka Dorbar Shnong.
Hapdeng kane, kala mih ka jingïania kaba jur hapdeng ki Nongïalam ka FKJGP bad ki Pulit hynrei da ka jingtuklar jong ki Nongtrei ka SMB kiba la pyni ïa ki kot ki sla ban khynra, ki Pulit ki la ailad ïa ka jingkhynra ba kan bteng hynrei ki la khang pat ban khang khyrdep ïa ki dukan.
Ha ka jingtohkit, ka FKJGP ka la shem ba bun ki nongbylla bar Jylla ha ka thaiñ kim shym la aplai ne don ïa ki labour licence bad bun ruh ki dei kiba la trei la bun bun snem khlem ki kot ki sla ba donkam.
Nalor kane, la shem ruh ba bun ki dukan ba pynïaid da ki bar jylla kim shym la pynthymmai ïa ki Trading Licence naduh u snem 2010 bad kane ka pyni ba ki la plie ïa ki dukan khlem ka licence haduh mynta.
U Bah Wirfortis Lyngdoh Mawphlang President ka FKJGP Malki bad u Organising Secretary ka FKJGP sengkmie, ula ong, ba ka jingpynlong ïa kane ka jingkhynra ka dei hadien ba ka seng ka la ïoh pdiang ïa ki jingujor ba bun ki bar jylla kim shym la don ïa ki kot ki sla ban khaïi pateng ne ki ban pynthymmai ïa ki kot khaïi pateng ha ka ophis jong ka SMB.
U Khrawkupar Nongsiej Organising Secretary ka FKJGP, ula ïathuh ba ha kane ka jingkhynra la shem ba bun ki bar jylla kim shym la pynthymmai ïa ki kot ki sla bad bun ki dukan ki la khang khyrdep lut haba ïoh jingtip ba ka don ka jingkhynra.
Ula pynpaw ïa ka jingbynñiaw, ba kitei ki dukan kim ju pynthymmai ïa ki kot ki sla la bun snem bad ka SMB ka dei ban pynlong ïa ka jingkhynra man la ka por.
“Baroh shi katta la ju ïohsngew ba ka Municipal ka ju ud ba kam ju don pisa, kumta ka dei ban pynlong ïa ka jingkhynra ha kylleng ki jaka bad kan lah ban pynmih ïa ka khajna khamtam haba bun ki bar jylla kim ju pynthymmai ïa ki kot ki sla” ong u Bah Nongsiej.
Ula ong ruh ba ka seng kan sa leit ban ïakynduh ia u Chief Executive Officer ka SMB ban phah khynra ïa ki dukan jong ki bar jylla kiba don ha ki jaka kiba hap ha ka jongkhmih jong ka Municipal bad ban jurip lang ruh ïa ka jingkyntur pud ïa ki jaka ki puta da ki bar jylla.