Khang tala ïaki dukan ba khlem kot khlem sla bad pan map ki bar jylla ha Khanapara, ai por 10 sngi ban pynbiang
Ba mlien lehkai ïarieh bad ki pulit KHADC
Nongpoh, Nailar 22: Namar ka jingmlien jong ki bar jylla ban leh buit tuh bad lehkai ïarieh bad ki pulit Enforcement jong ka KHADC kiba ju leit ban khynra Trading License sha ka thaiñ Khanapara, kiba ju khang pynsted ïaki dukan bad phet krad ïalade tang mar sien shah khynra, naka liang ki pulit Enforcement jong ka KHADC mynta ka sngi kila hiar biang sha katei ka jaka ban leit khynra naphang ïaki dukan bad khang tala ruh ïaki dukan ba khlem kot khlem sla hadien ka jingbitar ïaka jingbym kheiñ snep jong ki bar jylla.
Ïa katei ka jingleit khynra ki pulit Enforcement ka KHADC la ïalam da u Bah F Kharsyntiew Inpsector Incharge jong ka Ri-Bhoi bad lap ba kitei ki dukan kim shym la kheiñ snep ban leh ïaki Trading License ha kaba la khang tala ruh ïaki dukan bala pynieng skhor ïakitei ki bar jylla haduh ba kin da wan ban pan map bad kular ruh ban leh ïaki Trading License bad wad jingtip ruh nakitei ki pulit ka KHADC kumno ban ioh ïaka Trading License.
Naka liang ki pulit ka KHADC kila ai ruh da ka jingthoh sha baroh kitei ki dukan ba ki dei ban pynbiang ïaki kot ki sla hapoh 10 sngi bad lada kim leh ki dei ban khang duh syndon ïaki dukan jong ki bad lada kim lah ban leh kumta naka liang ki pulit Enforcement kin sa wan ban khang tala hi ïa kitei ki dukan ki bym lah ban pynbiang ïaki kot ki sla.
Shuh shuh naka liang u bah F Kharsyntiew Inspector ba dei peit ïaka Ri-Bhoi u la kren da ka jingbitar sha kitei ki trai dukan haba ki pulit ka Enforcement ki wan ban talasi ïaki kot ki sla kim dei ban khang pynsted ïaki dukan bad ban phet rieh ïalade kaba pynlong pat ïaki pulit ka KHADC ban bitar hynrei ki dei ban wan kren lada don kano kano ka jingeh bad ban pynbiang ïaki kot ki sla jong ki dukan kiba don hapoh u pud u sam ka jylla Meghalaya.