Ïasnohkti lang ki nongtrei Sorkar ha ka ïa khih ka KSU, kynjah jar ki ophis ha Mawsynram

Mawkyrwat, ‘Nailar 22: Ki lai tylli ki shnat trei kam jong ka KSU kaba kynthup ïa ka KSU Lawbah Border Area Circle, KSU Balat Border Area Circle bad Ka KSU Sawsymper Circle ki la pynlong da ka pakhang ophis mynta ka sngi 22/08/2024 hapoh jong ka Mawsynram C&RD Block na ka bynta ban kyntiew kyrdan noh ïa ka Mawsynram C &RD Block sha ka Civil Sub Division.
Hadien ka jingleit jurip jong ki dkhot la lap ba baroh ki ophis sorkar ki la khang lut kata naduh ka ophis jong u BDO, PHE Dept, Forest Dept, PWD(roads), ICDs, FEDCO, Post office bad kiwei kiwei ki ophis kiba hap hapoh jong ka Mawsynram C&RD Block.
Namarkata, ka seng ka ai khublei kyrpang ïa baroh ki paidbah bad khamtam eh ïa ki nongtrei ha ki ophis Sorkar kiba la ai ka jingkyrshan pura ïa kane ka jingïakhih na ka bynta ban dawa ïa ka sorkar ban kyntiew kyrdan noh ïa ka Mawsynram C &RD Block sha ka Civil Sub Division.
Ym tang kata, ka seng ka kyntu ruh ïa ka sorkar ba ka dei ban sngap ïa kane ka jingdawa ba shongnia jong ka seng bad ki paidbah ban kyntiew kyrdan sha ka Civil Sub Division ïa ka Mawsynram namar ka dei ka C&RD Block kaba la slem tam hapoh jong ka jylla Meghalaya.
Kane ka jingpakhang ophis kam shym ktah ïa ki Bank, ki jaka sumar (Hospital) bad ki jaka pule (School) ne kolej.
Shuh shuh ka Seng sa shisien kan khot kan wer ïa baroh ki nongïalam kaba kynthup naduh ki nongïalam Hima, nongïalam shnong, nongïalam Raid bad ki ‘riew rangbah jong ka dong ka thaiñ Mawsynram na ka bynta ban pynkhlaiñ ïa kane ka jingdawa Civil Sub Division ha ka 26/08/2024 ha ka por 11 baje mynstep ha ka Hall Dorbar jong ka Mawsynram Dongrum.
Kane ka long katkum ka kyrwoh ba la phah da u bah Macdonald Marbaniang, General Secretary KSU Sawsymper Circle.