Nongpoh, Nailur 04: Ha ka sienjam kaba tyngeh ban pyntreikam ïa ki kyndon ba pynkhuid mariang bad ban ïada ïa ka koit ka khiah u paidbah, u Principal Secretary ka Forest & Environment, u Sampath Kumar, ryngkat bad ki heh ophisar na ka Meghalaya State Pollution Control Board (MSPCB), kila pynlong ka jingjurip kaba bniah ïa kawei ka Industrial unit ha Byrnihat, ha ka 3 tarik Nailur 2024. Kane ka jingjurip ka long ka dei hadien ka jingïai bteng jong ki karkhana ban pynkheiñ ïa ki kyndon ba la pynmih da ka MSPCB.
Ha katei ka jingjurip la lap ba ki karkhana kim shym la don ïa u meter uba la buh kyrpang ban teh lakam ïa ki jingmih ki jakhlia lyngba ka Pollution Control Device (PCD), kaba pynpaw shai kitei ki karkhna kim lah ban tehlakam satia ïa ka jingmih ki tdem jaboh.
Kumba ka MSPCB ka la dep ban pynmih shibun ki kyndon sha ki karkhana, ban bthah ba kin teh lakam ïa ki jingmih ki Particulate Matter (PM 10 bad PM 2.5), Sulphur Dioxide (SO2), bad Nitrogen Dioxide (NO2) hapoh ki kyndon ba la buh ban ïada na ka jingjakhlia mariang bad ka jingma kaba lah ban ktah ïa ka koit ka khiah ki paidbah kiba shong ha ki jaka ba marjan. Hynrei, kaba sngewtriem ka long ba kitei ki karkhana kim shym la leh eiei ban pyntreikam ïa ki lad ban teh lakam, kynthup ïa ka jingpyntreikam kaba biang jong ka Pollution Control Device (PCD) bad ka jingpyntreikam ïa ka Online Continuous Emission Monitoring System (OCEMS) ha baroh ki jingmih jakhlia.
Halor katei ka jingpynkheiñ ïaki kyndon ka MSPCB, la phah khang khyrdep lut ïaki karkhana kiba lap ba pynmih jaboh ha katei ka jingjurip bad pynsangeh ïaka jingtreikam jong ki tad haduh ba kila lah ban pyndep ïa ki kyndon ba la buh ha ki aiñ kiba ïadei bad ka mariang.
