Nongstoiñ, Ïaïong 21: Ka District Magistrate Eastern West Khasi Hills District Mairang, ka la pynjari da ka Kyndon aiñ kaba 163 BNSS 2023 ban pyrkhing ban nym shah pynlong ïa kino kino ki jingïakop khwai dohkha bad jingpynkhalai nusip ha ki pung ne nan, kiba don ka jingjngai tang 1 kilometer na ka surok National Highway 44E.
Ïa kane ka aiñ la pynjari hadien ka jingjia dheng kali kaba la neh da ki lai bad saw kynta, ha ki bynta jong ka Kynshi-Mawlangren kaba don harud ka surok National Highway 44 E, tang na ka daw jong ka jingpynïakop khwai dohkha bad lucky draw ba la pynlong ha katei ka jaka. Kane ka jingdheng kali ka la ktah bad pynthut ïa ka ïaid ka ieng jong ki paidbah nongleit nongwan bad ruh ka la pynthut ïa ka jingïaid beit jong ki kali.
Shuh shuh, na ka liang ki nongpynïaid ïa kum kine ki jingïakop, kim shym la lah ban bud ryntih ïa ki kyndon ba la buh bad bthah ïa ki ban leh da ka ophis jong ka Deputy Commissioner, Eastern West Khasi Hills District. Dei halor kane la buh ïa ka jingpyrkhing ban nym shah ban pynlong ïa ka jingïakop khwai bad lucky draw ha kino kino ki jaka kiba dang hap hapoh ka 1 kilometer na ka surok bah.
Hynrei, lada don kiwei pat kiba kwah ban ai jingmut bad pynbeit ha kaba ïadei bad kane hukum, ki lah ban leit mih sha ka ophis jong ka Deputy Commissioner, Eastern West Khasi Hills District.
