Shillong, Ïaïong 21: Kum shi bynta ban pynkhlain ïa ka jingïatreilang ha ki kam thaw aiñ, ka Public Undertakings Committee (PUC) jong ka Ïingdorbar Thaw Aiñ jong ka Jylla Meghalaya kaba la ïalam da u Chairman u Bah Charles Marngar, MLA ki la leit ban jurip ïa ka Ïingdorbar Thaw Aiñ jong ka Jylla Arunachal Pradesh mynta ka sngi.
Ïa kane ka kynhun kaba kynthup ïa ki dkhot ba don burom u Marthon Sangma, u Sanjay Sangma, u Dr. Mizanur R. Kazi, bad u Jim M. Sangma,la pdiang sngewbha ïa ki ha Assembly Office da u Chairman jong ka Arunachal Pradesh PUC u Jikke Tako.
Haba pdiang sngewbha ïa ki nongthaw ain kiba la wan jngoh ïa ka jylla, u Jikke Tako u la pynpaw ïa ka jingdonkam jong ka jingiatreilang hapdeng ki jylla.
Ha ka jingkren u Bah Charles Marngar u la pynpaw ïa ka jingsngewnguh kaba khraw ïa ki nongïalam ka Jylla Arunachal Pradesh bad ki ophisar jong ka Assembly halor ka jingpdiang sngewbha jong ki.
U la ai ka jingkren kaba bniah halor ka bynta ba kongsan jong ka jingpeitngor ba ka PUC ka leh ha kaba pynthikna ïa ka jingkitkhlieh bad ka jingpynïaid beit ïa ka pisa tyngka jong ki public sector enterprises.
Ka jingïakren ka la nangpyniar sha ka jingïatai kaba thymmai, ha kaba ki dkhot na baroh ar tylli ki jylla ki la ïashim bynta ha ka jingïasam jingmut jingpyrkhat kiba kit jingmut.
Ki jingiakren ki la pynleit jingmut bha ha ki rukom treikam bapher bapher, ban wad bniah ïa ka jingtreikam kaba kham ïar jong ka kamram jong ka PUC, bad ban pyrkhat ïa ki buit thymmai ban kyntiew ïa ka jingtreikam ba janai jong ka committee.
Baroh ar ki kynhun ki la pynkut ïa ka jingïalang da ka jingkren kaba pynmih jingmyntoi, da kaba pynskhem biang ïa ka jingkular jong ki ban ïoh ïa ka jingsynshar kaba khlaiñ bad ban bteng ban pynkhlain ïa ki tnad thaw aiñ ha kylleng ka thaiñ Shatei Lam Mihngi.
