Shillong, K’lyngkot 17: San ngut ki briew kiba ju la ju mlien ban leit tuh masi, ki la shah bat bad shah kem ha ki paidbah ka thaiñ Mawlanghsu, West Khasi Hills District mynta ka sngi.
Kine ki san ngut ki long u Shemborlang Phyllut na Mawrang, Rambrai, uFamding Ryntathiang Mawkarah, u Ribansar Pariong na Pyndengrei, u Francis Pariong na Tiniang bad u Aiswel Nongrum na ka Shnong Mawlyndep.
Hadien ba la ïoh bat ïa ki la rah sha ka ïingdorbar Shnong ha kaba ki Sordar Shnong na katei ka thaiñ ki la ïadon lang ban shim jingtohkit bad ban bishar ïa ki katkum ki rukom treikam jong ka Shnong.
Haba ïakren bad ki Sordar na ki Shnong kiba na katei ka thaiñ, ki la ïathuh ba ki paidbah kiba ju ri masi ki la lyngngoh ïa ka jingjah klep jong ki masi ba ri hasem bad kiba ju pyllait ban leit bam phlang. Hadien ki la sdang ban ïoh jingtip ba ki la ju ïohi ïa ki briew kiba ipher kiba ju ñiah ïa ki masi na lum ne ha ki bynta ba sharud nong. Dei nangtei ba ki la sdang ban suba ba don ki briew kiba wan tuh masi na shnong ba ki shnong ba marjan.
Hadien kane, ki Sordar Shnong ki la ïatreilang bad ap ktem ne ap pahara ïa kine ki briew kiba wan beit da ki kali bad hadien ba ki la ïoh tuh ki sa kit noh bak na katei ka jaka. La ïathuh da ki Sordar ba kine ki nongtuh ki ju wan tuh ïa ki masi ha ka por mynmiet na sem bad don ruh ba ki tuh ha ka por mynsngi haba ki trai ki pyllait ïa ki masi ban leit bam phlang.
Ha ka jingbishar jong ki Sordar, kine ki san ngut ki la phla ba ki ju leit tuh masi na kylleng ki Shnong ha West Khasi Hills bad West Khasi Hills kum shaduh Langpih, Jashiar bad kiwei kiwei de ki Shnong.
Hadien ba la tohkit bniah ïa ki na ka liang ki Shnong ki la aiti noh sha ki Pulit ïa kine ki briew.
