Shillong, Rymphang 22: Da ka jinglah ban pynlong ïa ki jingkhynra, ki shipai BSF ba la peitngor bha jong ka Meghalaya ki la lah ban ïohkem ïa uwei u nong India bad ki jaiñ ba la bun bha ba la thmu ban shalan beaiñ ïa ki sha ri Bangladesh. Ïa une u briew la ïoh ban bat najan u pud u sam ka ri kaba ha East Khasi Hills, Meghalaya.
Ha kane ka jingleit khynra, ki shipai ka 4 Bn BSF ki la ïohi ba ka don ka jingïaid kaba ishankhmat ha shilynter ka khappud bad mardor ki la leit sha kane ka jaka ban leh ïa ka kam kaba donkam.
Ki BSF ki la ïoh ban kem ïa une u briew bad kawei ka kali Celerio ronglieh kaba la kit ïa ki jaiñ bad hadien ki la pynlong ka jingtohkit naba u khlem lah ban pyni ïa ki kot ki sla kiba la ïoh jingbit bad hadien ki la aiti noh sha ka tnat Custom, Dawki, na ka ban leh ïa ki kam katkum ki kyndon jong ka aiñ.
Kane ka jingïohkem ka pyni ïa ka jingshim khia ki BSF Meghalaya ban ïada ïa ki khappud ka ri bad ban ïada ïa ki kam beaiñ kum ki kam khaiï beaiñ bad ki kam rung tuh. Ki BSF ki ong ba ki long barabor kiba aiti ban pynneh ïa ka shongsuk shongsaiñ ha shilynter ki jaka khappud bad kan bteng ban shim ïa ki kam da kaba pyrkhing bha ïa ki kam beaiñ sha ki thaiñ khappud.
