Nongstoiñ, Jylliew 23: Ha ka miet jong ka sngi Nyngkong ki dkhot jong ka seng Hynñiewtrep Youths Council Siejlieh unit, ki la ïoh ban bat bad kem ïa kumba 9 ngut ei ei ki bar jylla kiba ïaid lyngba ka surok shnong Siejlieh da ka jingthmu ban leit bylla sha Borsohra South West Khasi Hills.
Haba tohkit, kine ki mynder kiba wan na ri thor bad kim shym don kano kano ka kot jingpynshisha haba ïa dei bad ka Trading licence na ka KHADC bad ruh na ka Labour Department. Kumta ka seng khlem pynslem ka la pynphai noh ïa ki ba kin leit sha ka jaka kaba ki wan.
U General Secretary ka HYC Siejlieh unit u samla Khrawkupar Marbaniang ha ka jingïadonlang ki dkhot jong ka Unit, u la ong, “Ka seng ka la dep kren shai ba kam kwah ïa ki bar jylla ba kin wan bylla ha ri lum jong ngi. Namar haba wan kiba nabar, ka knieh ïa kamai kajih na ki trai ri trai muluk bad ruh ka pynjaboh ruh ïa ka mariang. Namar kumba ïohi ki mynder kim don ïa kata ka saiñ pyrkhat ha ka leh khuid leh suba”.
“Ka seng ka la kyntu ruh ïa ki trai Ri kiba dei ki nongaikam bad nongseng kam, ba phin pyrkhat thymmai noh ban peit noh ïa la trai ri trai muluk ba phin ai kam. Ka jingai kam ïa ki trai ri trai muluk ka kyntiew ïa ka ïoh ka kot ka jylla khamtam lei ha kum kine ki por ba ka kamai kajih ka hiar bha”, u la ong.
