Shillong, Lber 23: Kum shi bynta na ka jingïaibteng ban leit khynra ïa ki dukan kiad beaiñ kiba kynthup ïa baroh ki jait kiad na ka liang ka tnat Excise ka la ïoh ban kurup bad kem ruh ïa katto katne kiba die kiad beaiñ ha ki jaka bapher bapher jong ka sor Shillong bad ki jaka ba khap sor.
Halor kane na ka liang ka ophis Deputy Commissioner (Excise), East Khasi Hills District ka la ïathuh ba ha ka jingkhynra kaba la sdang naduh u bnai Kyllalyngkor jong une u snem 2024, ki pulit ka Excise ki la ïoh ban leit khynra ïa ki dukan kiad kiba don haduh 13 tylli ki jaka bad ban kurup kumba 76.5 litar ka kiad pyrsi bad ka 146.145 litar ka kiad phareng.
Halor kane na ka liang ka tnat ka la ïoh ruh ban kem haduh 11 ngut ki briew kiba donkti ha kine ki kam beaiñ bad kumjuh ruh ki la shah pynngat hapoh ki kyndon jong ka Excise Act.
