Shillong Lber 23: U President ka NPP National bad u Myntri Rangbah ka jylla u Conrad K Sangma ha ka sngi Saitjaiñ, ula ong, ba ka Sorkar Jylla kan leh da kaba tyngeh pyrshah ïa kito kiba pyrshang ban pynthud ïa ka shongsuk shongsaiñ ha ka jylla.
Haba ïakren bad ki lad pathai khubor u Myntri Rangbah u la ong, “Ki pulit kila trei shitom bha ha ki snem kiba la dep bad kila buh ruh ïa la ka jingim ha ka jingma bad kila ïoh kem ruh ïa bun ngut bad kila don ruh bun jait ki jingshah byrngem byrsit hynrei kila lah ban tehlakam noh bad ki pulit kila trei palat por ban pynthikna ba ki briew kiba donkti ha kaban pynthud ïa ka shongsuk shongsaiñ ha ka jylla kidei ban shah pynshitom da kaba tyngeh.”
U la ong ruh ba ka sorkar kan ym kheiñ sting bad u la iathuh ruh ba ha ka sngi saitjaiñ ula lum ïa ka jingïalang halor ka jinglong jingman ha ka jylla ha kaba la donlang u Myntri ka kam Pohïing ka jylla u Bah Prestone Tynsong, u Chief Secretary ka jylla u Bah D.P Wahlang bad u DGP ka jylla u Dr LR Bishnoi.
“Ngi la shimkhia ïa ka kam ban pynthikna ba lada ka long kumno kumno ruh, baroh kiba donkti ne kiba pyrshang ban pynthud ïa ka shongsuk shongshngaiñ, ngin leh da kaba tyngeh ïa ki,” ïathuh u Myntri Rangbah.
