Shillong Lber 23: U Myntri Rangbah ka jylla bad u National President ka National Peoples Party (NPP) u Conrad K Sangma ula ong, ba ka la don ka jingïasngewthuh jingmut kaba skhem hapdeng ki seng kiba ïatreilang hapoh ka kynhun National Democratic Alliance (NDA) ban kyrshan ïa ki kyrtong ka NDA ha ka ilekshon MP Lok Sabha.
Haba iakren bad ki lad pathai khubor u la ong, “Ka la don ka jingïasngewthuh jingmut kaba skhem hapdeng ki paralok kiba donlang ha ka Sorkar Pdeng ban ïa kyrshan ïa ki kyrtong ka NDA ha kylleng ki Constituency bad ka ai nuksa ba u kyrtong ka NDA ha Nagaland u dei na ka seng NDPP. Ka la don ka jingïaid kaba khlaiñ ban sei ïa u kyrtong monlang ban kyrshan ïa u kyrtong jong ka NDA bad ha ka jylla Meghalaya kan dei ka seng NPP, ha Nagaland ka NDPP bad ha ka Outer Manipur ka NPF bad ha Manipur ka BJP.”
“U la ong ngan sa leit sha Nagaland ban leit ïakynduh ïa u Myntri Rangbah ka Nagaland, ha kaba yn leit lang ryngkat ki nongïalam ka seng bad ki MLA ban ïakren halor katei ka mat. Kumba long mynta, u James PK Sangma u don hapoh Arunachal Pradesh ban ïakren halor katei ka kam kaba ïadei bad ka ilekshon MP. Nga la ïakynduh ruh ïa ki nongïalam na ka jylla Manipur kiba la wan sha ka nongbah Shillong ban ïakren halor ka kam ilekshon ban pynthikna ban ai jingkyrshan ïa ki kyrtong ka NDA,” ong u National President ka NPP.
Ula ong, ha ka jylla ba don ka BJP bad ki jaka kiba khlaiñ ka NDPP ne ka don ïa ki nongmihkhmat ki jongki kumta kin kyrshan ïa u kyrtong ka NDA.
Halor kaba ïadei bad ka MP ilekshon Lok Sabha ha Shillong bad Tura khamtam haba ka BJP ka la rai ban ai jingkyrshan ïa ka NPP, u Conrad ula ong “Ngam ju ngeit ba ngi la don lypa ha kyrdan kaba biang bad ngam kwah ban pyrkhat kumtei ne ban long kiba la skhem jingmut shaba palat ha ka ilekshon. Nga ju ong, ïa katei ha man la ki ilekshon bad ngam ju kheiñ sting namar man la ka ilekshon kadei kaba don ïa ka jingïakhun, ngi hap ban trei shitom ha Tura bad ngim lah ban kheiñ sting noh bad ngin ym kheiñ sting hi ruh”.
Halor ka Shillong konstituensi, u Conrad ula ong, “Ngi la trei shitom bha hangne bad ngi ai khublei ïa baroh ki seng saiñ pyrthei kiba ai ïa ka jingkyrshan ïa ngi, la kadei ba ngi ïoh ïa ka jingkyrshan mynta na ka BJP ne ka jingai jingkyrshan ka TMC ha Nongthymmai Constituency bad shabar jong ka Nongthymmai Constituency ruh. Ngi la ïoh ïa ka jingkyrshan na kylleng hynrei ngi dang treikam shuh shuh ban don ka jingïadei bad ki paidbah bad ban ïalap ilekshon na ka bynta ka kyrtong bad kane kan dang ïaid shakhmat bad ngin ap khmih lynti beit ïa kaba bha”.
U la ong, ka jingwan ai jingkyrshan jong kino kino ki riewshimet ne kino kino ka seng ka long kaba bha bad kan long ka jingmyntoi ïa ka NPP ha kane ka ilekshon kaba mynta.
