Sam tiar bad ai jingsumar ei ki shipai BSF ha khappud Shillong, Lber 22: Kum shibynta na ka jingthmu ban ïarap ïa ka bha ka miat jong ki nongshong shnong kiba sah ha khappud na ka liang ki BSF Meghalaya ki la pynlong ïa ka prokram ïarap ïa ki paidbah ne ka Civic Action Programme (CAP) kaba ïaid lang bad ka jingai jingsumar ei ha ka sngi Palei hapoh ki shnong kiba hab hapoh khappud ki shnong kum ka Dangar bad Nolikata kiba ha East bad South West Khasi Hills district. ïa ka prokram la pynlong da ka jingdonlang u Manoj Kumar Barnwal, DIG SHQ BSF Shillong bad u Rajiv Kumar, Comdt 193 Bn BSF. Ha kane ka prokram la wan ban shim bynta shitrhem da ki rangbah shnong jong ki shnong ba marjan, ki Medical Officer napoh ka PHC Dangar bad kumba 650 ngut ki nongshong shnong sawdong ka thaiñ bad ki khynnah skul. La sdang ïa kane ka prokram da ka jingthmu ban ai ka jingïarap ïa ki paidbah kiba don kam ïa ki lad jingsumar ha ka koit ka khiah bad ka jingïarap ïa ki shnong kiba sah ha ki thaiñ khappud. Ha kane ka CAP, kiba bun ki tiar kiba kongsan kum ki kor computer, ki top pynlang um, ki shuki plastic bad ki meij, nangta ki tiar ïalehkai, bad kiwei pat ki tiar, la sam sha ki shnong ba marjan bad sha ki khynnah skul. Ha ka jingai jingsumar ei ne ka Free Medical Camp, ki Doctor napoh ki jaka summar ki BSF ki la donkti lang ban khmih ïa ki nongpang bad ban ai ei ruh ia ki dawai sha ki nongpang. Shuh shuh ki la don ki prokram lariti ba la pynlong da ki khynnah skul ba don sap jong ka Govt Upper Primary School Dangar. Na ka liang ki rangbah shnong bad ki nongshong shnong ka thain ki la pynpaw ïa ka jingïaroh ïa kine ki kam leh isynei jong ki BSF Meghalaya kiba la sam ia ki tiar kiba kongsan bad ki jingïarap ha ki jingai dawai ïa ki nongshong shnong kiba donkam ha khappud.