Shillong, K’Lyngkot 18 : U MLA ka HSPDP na Mawkyrwat, ba dang shu resain shen hynne ka sngi Balang, Bah Renikton L Tongkhar u la ong haba pyrshang ban pynkhlaiñ lut ïa ki party riewlum kiba don ha ka jylla, katta ki nang tlot.
Haba kren ïa kane ha ka jingïalang leit pynïasoh sha ka UDP, u Bah Renikton u la ong ruh ba naduh u snem 2018 u la ïohi ïa kane ha kaba ym don kawei ruh ka party riewlum kaban jop bun ngut. U la nuksa ruh da kaba ong ba ha katei ka por, ka UDP ka jop tang 6 ngut, ka PDF ka jop 4 ngut, ka HSPDP tang arngut bad KHNAM tang uwei.
“Ym don kawei ruh ka party kaba khlaiñ. Kumta haba la jop ngi la ïa pyrshang kumno ban pynkhlaiñ ïa ka party riewlum ha Meghalaya. Namar lada ngim leh kumta, ngin sa tlot biang,” u la ïathuh.
Shuh shuh u la ong ruh ba um don daw ei ei ïa ka HSPDP hynrei ka daw kaba hakhmat eh ka long ba u kwah ban ïohi ïa ka jingïatylli bad ka jingkhlaiñ jong ka party riewlum bad dei na kata ka daw u la phaikhmat sha ka UDP kaba u la don ha syndah syndah naduh ki 10 snem mynshwa.
“Nga kwah ban ïohi ba sa shisien kin win ki khlaw bad sa shisien kin khih ki maw bad kane kan jia biang ha u 2023,” u la ong da kaba pynpaw ruh ba dei halor katei ka nongrim ba kitei ki san ngut ki la shim ïa ka jingkitkhlieh namar ki kwah ban ïohi ba ka jingkwah jong ki paidbah kan urlong.
