Shillong, Jymmang, 20: Uwei u nongleit jingleit uba wan na Mizoram da kawei ka kali Tata Sumo ha ka Lah Sngi u Blei ha ka por kumba 7:00 baje mynstep katba u dang hiar ban leit pynjhieh harud surok NH-6 ha ka thaiñ Kuliang u la lap pynban ïa kawei ka metïap ba la song ha ka nep syiad ba la sdang sma pyut bad mar mar u la pyntip sha ki Pulit ka Umkiang Police Patrol Post kiba dang pynïaid kali ha surokbah.
U kyrwoh ba la phah da u Superintendent of Police ka East Jaiñtia Hills District ha ka sngi Baar u la pyntip, u SI P. Phawa ba la synran lang bad ki Pulit ki la leit mar mar sha ka jaka ba la lap ïa ka metïap kaba jngai kumba 8 kilomitar na Kuliang Police Patrol Post ha surokbah NH-6.
Ki Pulit kiba la pynlong ïa ka jingtohkit ha jaka ba la lap ïa ka metïap kim shym la lap ba don dak mong eiei na ka daw ba ka met ka la pyut.
Ïa uba ïap la antad ba u dei uba la don kumba 35-40 snem ka rta, ka rynieng kaba jrong san phut san inshi, bad ba shai sniehdoh.
Uba ïap u phong da ka sopti rong iong, ka T-shirt rong jyrngam bad u ksai lieh ba teh ha ryngdang kti bad la shu ngeit ba u lah ban dei u riewngeit Hindu.
Hadien ba la pyndep ïa ki jingdonkam katkum ka aiñ, ïa ka met ïap la pynkit noh sha Khliehriat Civil Hospital ban leh ïa ka post-mortem bad ïa ka met mynta la buh ha ka jaka buh metïap ban dup ithuh.
U SP u la pynti ba kino kino kiba lah ban ithuh durkhmat ïa une uba ïap la kyrpad ba kin pyntip noh mardor sha u Investigating Officer (IO) ha u nombar 8131904491 khnang ban ioh leh ïa kaba donkam.
