Kan ym don jingktah ïa ka party ha Garo Hills na ka jingdawa pynkylla ïa ka Reservation Policy: Ardent

Shillong, Lber 30: U President ka VPP u Bah Ardent M Basaïawmoit ha ka sngi Palei u la pynpaw ïa ka jingsngew skhem ba ka VPP kan ïoh ka jingkyrshan kaba pura wat ha Rilum Garo ha ki elekshon ban wan wat lada ki don kiba pyrshang ban ïalam bakla ba ka VPP ka dei ka party jong ki Khasi kaban knieh lut ïa ka bhah ba dei hok jong ki paid Garo.
“Kane ka jingdawa ban pynkylla ïa ka Reservation Policy kan ym don jingktah eiei ïa ka party ha ka elekshon ba kan ïakhun na Rilum Garo namar ka jingïakhun ban pynkylla ïa ka Reservation Policy kam dei pyrshah ïa ki Garo hynrei ïa ka sorkar kaba kuman ban pynbeit ïa ka State Reservation Policy kat kum ka jingdawa ka por bad ka bad nga sngew skhem ba ki paidbah Garo ruh ki sngewthuh ïa kane ka jingthmu ba bha jong ngi ym ban shah ïalam bakla ha ki katto katne,” Jubab u Bah Ardent haba kylli la ka jingdawa ka VPP ka ban pynkylla ïa ka Reservation Policy kan don jingktah ne em ïa ka jingparty ha Rilum Garo.
U la ïathuh ruh ba ki don ki riew rangbah kiba na Rilum Garo ki pynpaw ba ka lynti ïaid kaba ka VPP ka shim ka dei ka lynti kaba thymmai bad kaba shitom bad kaba lah ruh ban urlong.
“Ki don ki riewrangbah kiba la ong ba kane ka jingïakhun elekshon ka VPP ka dei ka lynti kaba thymmai kaba ym pat ju don mynno mynno ruh ha ka history ha Rilum Garo ki la ong shai ba namar ka dei ka lynti kaba thymmai kan long ruh kaba kham shimpor ban pynsngewthuh ym ban shu khmih lynti ban ioh kheit noh ïa ki soh marmar, hynrei kam dei pat kaei kaei kaba ym lah ban urlong ki la ïathuh ïa nga,” u la bynrap.