Kan dei ka khana pateng ïa ka skul ban poi sha ka kyrdan nyngkong ha ka SSLC eksam, ong u Principal GPHSS

Shillong, Ïaïong 07: Kan long ka khana pateng ka ban sah kynmaw ïa ka Gorkha Pathashala Higher Secondary school (GPHSS) kaba ha une u snem baroh shisnem ka rakhe ïa ka jingdap kaba 150 snem naduh ba la seng ïa ka naduh u snem 1876 haduh une u snem 2026 naba laingut na ki khynnah skul jong ka ki la poi ha ka kyrdan top position ha ka SSLC eksam mynta u snem, ha kaba uwei na ki u la poi ha ka kyrdan kaba nyngkong eh u samla Wangaal Lama.
Halor kane haba kren bad ki katto katne ki lad pathai khubor u principal ka skul u Amit Thapa u la pynpaw ïa ka jingkmen kaba khraw bha halor kane ka nam bad ka burom kaba dei ha ka sien kaba nyngkong eh ba ka skul ka la ïoh ban ha kane ka kyrdan kaba don burom bha.
U la ong ba kan long ka khyllipmat kaba kmen bad ka ban sah ha ka khana pateng jong ka skul naba kadei ha ka sien kaba nyngkong eh ba ka skul ka la ïoh bad poi ha kane ka kyrdan.
U la pynpaw ka jingai khublei ïa ki nonghikai kiba ju ïatreilang bad ki khynnah skul ban ïarap ïa ki ha kiba bun ki bynta bad pynpaw ruh ka jingkyrmen ba ka skul kumba ka la ju ïatreilang bad baroh kan dang ïoh mynsiem na kane ka jingpoi ki khynnah skul jong ka sha kane ka kyrdan kaba la wanrah burom ïa ka skul.
U Principal u la ïathuh ruh ba ka skul naduh mynshwa ka la long barabor kaba la pynkhreh ïa ki khynnah skul kiba ju leit ban ïakhun ïa ka eksam SSLC bad kumjuh ruh ki nonghikai ki long barabor kiba trei shitom ban ïarap lang ïa ki khynnah skul.
“Ngim shym da la poi pyrkhat ba ka skul jong ngi kan poi sha kane ka kyrdan, namar bun ki khynnah skul ki dei kiba wan na ki longïing kiba tlot ka ïoh ka kot hynrei kane ka jingïoh ïa kane ka kyrdan ka long ka burom kaba khraw ïa ka skul, ki nonghikai bad ïa ki khynnah skul baroh,” ong u Principal.