Kam myntoi ban shu kyntiew kyrdan khlem biang ka rukom treikam

Ka long kaba sngew tynnad ban iohsngew ïa ka jingthmu babha bad ka jingkut jingmut jong ka Sorkar Jylla kaba la ialam da ka NPP na ka bynta ban wanrah ïa ki kam pynroi na ka bynta ka jingbit jingbiang jong ki paidbah nongshong shnong ka jylla. Sngew tynnad ban iohsngew ba ka Sorkar Jylla ka la kyntiew kyrdan ruh ïa ki Police Outpost sha ka Police Station bad nangta na ki Administrative Unit sha ka Civil Sub-Division kumjuh ruh ïa ki Primary Health Centre sha ka Community Health Centre bad kumta ter ter.
Hynrei kaba sngewsih ka long ba la shu pynkiew kyrdan tang ka nam khlem ki nongtrei kiba biang, khlem ki shlem treikam kiba biangbad bunsien la shu kut tang ha ka jingkhap ribbon bad ka jingbuh maw nongrim bad ka jia ruh hateng hateng ba ym don wat ha ka mang tyngka la shu buh mawnongrim bad kyntiew kyrdan kaba long kum ka jing pynthame ïa ki paidbah shuwa ka election.
La sakhi ruh ba tang haka district Ri-Bhoi kila don ki Police Outpost, ki jaka sumar kiba la kyntiew kyrdan hynrei ka rukom treikam ka dang neh sah kumjuh ba ka sorkar kam shym la shimkhia eiei ban pynbun ïa ki nongtrei bad ban pynjanai ïaka rukom treikam hynrei la shu kyntiew tang ka kyrteng khlem ka kam.
Namarkata ka jingkyntu ïa ka Sorkar Jylla ka long ba ka dei ban pynbiang noh kloi ïa ki jingdonkam ha ki ophis treikam jong ka Sorkar, ki jaka sumar ba la kyntiew kyrdan, khnang ba ki paidbah jong ka dong ka thaiñ, ka District bad ka jylla kin ioh jingmyntoi na ki kam pynroi ba la wanrah da ka Sorkar Jylla ban pyniajan bad ki ban pynmyntoi shikatdei eh ia ki paidbah.