Jowai, Risaw 29: Ka Womens Welfare Organi-sation Sein Raij Jowai kumba ju long manla u snem hynnin ka sngi kala pynlong ïa ka prokram pynkup burom ïa ki samla pule jong ki khun ka ñiamtrai kiba la wan shakhmat haki jingpule naduh ka kyrdan P.hd bad ïa kiba ïoh 80% shaneng haka kyrdan SSLC bad HSSLC.
Ïa ka jingïalang la pynïaid da ka samla Dathrang I Passah bad u Salanda-O Langdoh, ha kaba la ïadonlang naduh ka kong Bandarisha Lyndem, Chief Engineer PHE jong ka sorkar jylla kum ka kongsan, u Antonio Lakiang, Deputy Secretary to the Governor of Meghalaya, ma Hercules Toi President Seinraij Jowai, ka kong Wandalan Dkhar, Chairperson WWO-Seiñraij Jowai, Ridaka Lamar, Vice-Chairperson WWO-Seiñraij Jowai, ki riew rangbah, ki longkmie bad ki khun samla.
Na ka liang ki khun ka Niamtrai kiba la ïoh ïa kane ka khusnam mynta u snem kila don haduh 11 ngut ha ka SSLC, 3 ngut haka HSSLC bad 2 ngut haka kyrdan Doctorate.
Napdeng kine ar ngut kiba la ïoh ïa ka kyrdan Seiñraij Topper kita ka Mayanka Pde na ka dong Salini Mihmyntdu kaba pule ha Jowai Govt. Public School da kaba pass ïaka ICSE Examination 2023 bad ïoh 94.3% lem bad 5 tylli ki Distinction (English, Khasi, Social Science, Mathematics, Science & Home Science). Sa uwei samla Wansame Pakyntein ba pule haka Sri. Chaitanya Junior Kala Sale Pragathi Nagar, Hyderabad uba la ïoh 90.21% lem bad ki distinction haki saw tylli ki subject kynthup (English, French, Zoology bad ka Botony).
Ka kongsan ha kane ka sngi kong Badarisha Lyndem haba ai jingkren ka la ai mysien ïa kitei samla pule ba kin dang ïai treishitom ha ryngkat ka jingbat ïa ka jinglong tynrai khnang ban long ka burom bakhraw ïa ka ïing ka sem, ka shnong ka thaw bad ba kin lah ban wan rah nam shuh shuh hakhmat jong ka pyrthei.
Ha kane ka sngi la pynphuh pynphieng shuh shuh da ki jingrwai, ki jingshad ba la shim bynta da ki khun samla ka Seiñraij, Umchangiar, kynthup ïa ki longkmie na ka Loompyrdi Iongpiah.
