Nongstoiñ, K’lyngkot, 20: Ka seng kaba la tip kum ka Hynñiewtrep Achik People Council hapoh ka jingïalam jong u samla Jylliew Marweiñ President rangbah ka HAPC, mynnin ka janmiet ka la leit ban jurip ïa ki katto katne tylli ki kali kit dewiong kiba ïaid lyngba ka surok ka thaiñ Riangdo, West Khasi Hills District.
Haba katei ka seng ka la leit ban jurip, la lap ba don ki kali kiba don ïa ki challan. Hynrei don ruh ki kali kiba ïaid khlem ka challan bad kiba ong ka challan ka don bad ki dalal.
Ka seng ka la kylli pyrthew ïa ki kattto katne ngut ki nongñiah ïa ki kali heh bad phah pyni ruh ïa ki challan kaba la ai da ka sorkar, la ïohi ba ki challan kiba la ai da ka sorkar ka don ïa ki jingthoh kaba la ai jingbit ban kit tang 12 ton u dewiong. Katba wat ki kali kiba tang 6 shaka ruh ki la kit haduh 29 ton.
Haba ïadei bad kane ka phang, u samla Jylliew u la ong un leit shaduh ka ïingbishar namar la shu leh donbor than.
U la ong shuh shuh ba ki pulit balei kim kem haba don kiba pynkheiñ aiñ. Ka daw dei namar ki heh ki haiñ kiba dei naduh ki myntri sorkar haduh ki pulit ki ïadon kti lang ban bamsap.
