Mawkyrwat, K’lyngkot 20: u District Magistrate ka South West Khasi Hills District, Mawkyrwat u la pyntip ba hadien ba ka Election Commission ka ri India ka la pynbna ïa ka General election sha Meghalaya Legislative Assembly ha ka 27 u Rymphang, 2023. Kumta la pynjari ïa ka Section 144 CrPc ha South West Khasi Hills District ha kaba la khang bad mana na kaba rah ïa ki suloi bad ki tiar pynmynsaw kynthup ka jingpynmih huri hura da uno uno u nongshong shnong kaba lah ban pynthud ïa ka jingïaid-beit ïaid-ryntih jong ka elekahon ha South West Khasi Hills.
Kumta ka long kaba donkam ban don ka jingshongsuk shong-shngaiñ ha baroh kawei ka distrik bad ka jingrah ïa ki suloi bad kiwei kiwei ki tiar pynmynsaw da ki katto katne ki nongshong shnong jong ka distrik ka lah ban wanrah ka jingthaw kulmar, shong syier bad kiwei kaba lah ban pynduh ïa ka hok jong ki nongshong shnong ban leit ïashimbynta ha ka jingïathep vote.
Namarkata, u la wer ïa ki nongshong shnong kiba don ïa ki license suloi ban leit buh noh mar mar iïa ki tiar jong ki ha kano kano ka Police Station kaba don hajan hapoh 10 sngi naduh ba pynmih ïa kane ka hukum bad lada jia ba kim leh kumba la bthah yn kheiñ ne niew beaiñ bad yn shim ruh kum ka dak ban khanglad ïa ki nongtrei sorkar na kaba pyndep ïa ki kamram jong ki kaba long ruh ka jingshah pynshitom kat kum ka Section 186 IPC., hynrei la pyllait ïa ki dkhot ka National Rifle Association ha ki kyrdan bapher bapher na kitei ki jingpyrkhing haneng.
Kane ka hukum kan treikam mardor tad haduh ban da pynbna da kumwei pat.
