Kaei kaba leh ki kmie ki kpa, ki khun kin sa leh lang, ong u Bah Ronnie ha Cherished Buds

Shillong, Nohprah 14 : U MLA ka Mylliem, Bah Ronnie V Lyngdoh u la ong ba ha kane ka juk mynta kano kano ka kam kaba ki kmie ki kpa ki leh ha la iing, ki khun ki kloi bha ban pyrthuh bud bad leh lang thik kumba leh ma ki.
Ïa kane u la kren ha ka jingïalang ba la pynlong ka skul Cherished Buds, Lummawbah ha ka sngi Balang ban pynkup burom ïa ki heprit kiba la pyndep ïa ka KG5 ban kiew sha klas 1.
Ka skul Cherished Buds School, Lummawbah ha ka 11 tarik Nohprah 2024 ka la pynlong da ka pre-school graduate ïa ki 21 ngut ki khynnah skul jong ka class Kg 5 ki ban sa kiew ha ka klass 1 ïa kaba la pynlong ha phyllaw ka skul
La pynkup burom ïa kine ki khynnah skul da u MLA u bah Ronnie V Lyngdoh kum u kongsan uba dei u MLA/MDC ka Mylliem Constituency ryngkat ki bor pynïaid jong ka skul, ki nonghikai bad kumjuh da ka jingdon lang ki kmie ki kpa jong ki heprit.
Haba ai jingkren ha kane ka sngi u bah Ronnie u la kyntu ïa ki kmie ki kpa ba kim dei ban leh ne kren katba mon ïa ki khun hynrei dei ban kren ïa ki da ka jingstad namar da ka jingnang ban hikai ki khun kin sa heh sa san da ka jingim kaba bha
Kumjuh ruh u la kyntu ïa ki kmie ki kpa ba kim dei ban pynïanujor ïa ki khun badno badno hynrei dei ban pynshlur ïa ki namar u Blei u la ai la ki jong ki sap ïa ki.
“Man la iwei pa iwei i khun jong phi i don la ka jong ka jong ka jinglah bad ka jingshemphang kumta phim dei ban ïanujor badno badno namar kane kan ktah ïa ki lada phi leh kumta. Kan bha shibun lada phi lah ban ai mynsiem bad pynshlur ïa ki,” u la ong.
U Bah Ronnie u la ong ruh ba kum u kpa u la mad bad ïaid lyngba lut ïa kine bad dei na kane ka daw u kwah ba ki kmie ki kpa ruh ba kin pynlut ka por bad ban sngewthuh ïa ka jinglah jong ki khun jong ki.