Shillong, Nohprah, 14: Ka Deen Dayal Upadhyay Community College (DDUCC), Wahïajer ka kolej kaba don bynta ka North-Eastern Hill University (NEHU) ka la ai jinghikai hynriew sngi kynthih ïa ki samla kynthei ha ka “Makeup & Hairstyling” ne ka jingpynitynnat ïa ka durkhmat bad ïa u shñiuh kaba la sdang naduh ka 9 tarik bad kaba la pynkut ha ka sngi Saitjaiñ.
Ka jingthmu jong ka prokram ka long ban ai ïa ki jingshemphang ba kham ïapher shaphang ki jingtip kiba thymmai ha ka jinglong jong u shniuh, ka jingpynitynnad ïa ka durkhmat bad ki buit ba bniah.
U Prof. H. Lamin (Retd) uba long ruh u Founder Principal I/c, DDUCC, Wahïajer u la long kum u kongsan ha ka sngi plie u la pynpaw ïa ka thong bad ka jingthmu ba kongsan jong ka DDUCC ka long ban pynkupbor ïa ki paidbah da ki jait jinghikai pyntbit bapher bapher kum shi bynta jong ka pule ka puthi jong ka NEP 2020.
Kane ka jingai jinghikai ka la khring ïa ki samla kynthei kiba sngewtynnad ban ïashim bynta kiba khmih lynti kum ka lad ban pyntbit ïa la ka jong ka sap ha ka kam pynitynnad durkhmat bad pynitynnad ïa ki shniuh khlieh.
Ha kaba pynkut ïa ka prokram, ki nongïashim bynta ki la ïoh jingmyntoi shibun na ki riewshemphang kiba la ai hikai katkum ka jingtbit ka jong ki.
Ïa ki jingai jinghikai kaba hynriew sngi kynthih la pynïaid da Kong Jenefa Lamare bad ka Kong U. Artysong Lamare kum Resource Person/Nonghikai ha kane ka kam.
Kane ka prokram ai jinghikai kyrpang ka pynleit jingmut ha kaba pynbha ïa ka jingstad jong ki riew kynthei bad ki jingpyntbit bathymmai da ka jingthmu ban pynshlur ïa ki ban long ki nongsengkam sengjam ha ka kam “Makeup & Hairstyling.” Ka jingthmu jong ka prokram ka long ban ïarap bad wad bniah ïa ki pud jong ka jingstad jong kine ki samla khnang ban plie lad ban ïashim bynta da ka jingshaniah kaba pura ha ka kane ka pyrthei khaii pateng jong ka kam pynitynnad ïa ka durkhmat.
Ha kane ka sngi, la sakhi lang da u Executive Member jong ka Khasi Hills Autonomous District Council (KHADC) u Bah Teiborlang Pathaw uba la long kum u kongsan ryngkat lang u Librarian jong ka NEHU u Dr. F.R. Sumer uba la long kum u symbud kongsan, u nonghikai barim jong ka Sacred Heart Hr. Sec. Boys School, Mawlai, Shillong Bah Maurice Lyngdoh, u dkhot jong ka shnong Wahïajer u Bah Rimis Pyrtuh bad kiwei kiwei kiba la shah khot kyrpang.
U Bah Teibor u la ai mynsiem ïa ki nongïashim bynta bad u la kitbok kitrwiang ba ka lawei jong ki kan long kaba seisoh bad ka ban long ka jingïarap ym tang ïa ki shimet hynrei ïa ka shnong ka thaw.
U Bah Rimis Pyrtuh u la ong ba ka imlang sahlang jong ka shnong Wahïajer ka la ïohi ïa ki jingnoh synñiang kiba kongsan da ka NEHU hapoh ka jingïalam jong u Prof P.S. Shukla, u Vice-Chancellor jong ka NEHU bad ka Prof S.M. Sungoh kum ka Principal I/c jong ka DDUCC.
Kum ka skulbah ka pyni ïa ka jingthmu ban kyntiew ïa ka jingstad bad jingpynwandur jong ki samla lyngba ki prokram pynroi sap bapher bapher.
La pynkynmaw ba ha ki snem 2023-24, ka DDUCC, Wahïajer ka la pynlong haduh 21 tylli ki prokram pynroi sap kiba la ïoh ïa ka jingkynthoh kaba bha na ki paidbah ha ka thaiñ. Ïa ka jingpyrkhat jong ka imlang sahlang la ïasam sha ki nongsngap katba ki dang khmih lynti ïa ki kam ba ka kolej kan sa pynurlong ha ki snem ban wan da kaba pynleit jingmut ha ki prokram ai jinghikai ïa ki sap kiba donkam ban ïarap ïa ki briew shimet kiba donkam ban kamai jakpoh wat hapdeng ki jingeh kiba ki ïakynduh bad ka ai ruh ïa ki lad ki lynti ïa ki samla ban long kiba la pynkhreh da ki sap jong ki kam bapher bapher na ka bynta ban pyndap pynbiang ïa lade.
Shwa ban pynkut, la sam ïa ki syrnot sha baroh ki samla kynthei kiba la ïoh ïa ka jinghikai pyntbit.
